香港仔珍寶海鮮舫逾40年歷史，不少名人藝人都幫襯過，杜汶澤昨日回覆《蘋果》時說：「我細個家境清貧，舅父喺嗰度做經理，細個成日去，去親唔使畀錢，我第一次食龍蝦都係喺珍寶。舅父最初係做樓面，有次佢執到匯豐銀行行長跌嘅銀包，佢衝出交返畀佢，對方寫咗封信嘉許。我都好耐冇去，對上係好多年前，同梁洛施、佢媽咪去，梁洛施嗰時都未做人媽咪。」
影帝黃秋生同樣表示到海鮮舫是兒時回憶，他說：「細個去過飲，最有印象係食蒸魚，好大條，之後都冇去食。十幾年前去拍過戲，地方非常有代表性，食物真係冇所謂。」秋生對珍寶海鮮舫停業感可惜，他說：「其實可以分租出去，好似街市啲排檔咁做，仲有特色，唔做即係香港仔冇咗香港仔。裝修好唐人街，冇咗佢，嗰邊啲氣場完咗，大鑊了。」
採訪：比華利