徐天佑、吳海昕及劉俊謙早前遠赴北海道拍攝ViuTV穿越劇《二月廿九》，天佑與吳海昕日前接受訪問，大談於北海道拍攝時的辛苦經歷，當時是攝氏零下13度，天佑躺在冰上凍僵了雙腳，而吳海昕更在大風雪下拍嗌交戲，凍到面癱。
吳海昕在《二月廿九》飾演的角色於2月29日生日，2017年2月28日她許願時，突然有股神奇力量讓她穿越到三年後的北海道，周旋於暖男徐天佑與高傲的劉俊軒之間，她更可預知死亡。
貼滿30個暖包
吳海昕與天佑起初以為去日本可以寓工作於娛樂，豈料在零下13度拍攝，吳海昕試過凍到面癱：「我同劉俊謙有一場戲喺雪地上拉扯、做一場有情緒嘅戲，咁啱大風雪，一擘大口啲雪就飛晒入口，口裏面嘅神經線麻痹，我哋面癱咗，因為腦入面好多情緒同對白要爆發，但係塊面啲肌肉控制唔到，一cut機就要搵熱水漱口同暖包敷面。我哋仲要連戲，着夏天戲服，裏面要貼30個暖包。因為都拍得好急，我哋要憑意志力，唔可以病，好彩最終都順利。」
天氣寒冷，天佑拍攝時也凍僵了雙腳：「我都冇諗過凍成點，有一日喺戶外拍攝，體感嘅溫度零下13度，我仲要瞓喺冰上面，拍拍吓發現隻腳冇咗感覺，要即刻停，入返室內，不停捽，先有痛嘅感覺，好快冇事就再拍過。」
自己改變命運
劇中帶出的訊息是關於人的成長，天佑昔日多數演壞男孩，今次卻要做暖男，他說是因為自己都慢慢變了：「人生嘅命運係咪整定？我就覺得係可以憑自己改變少少，唔可以話因為整定乜都唔做，自己嘅命運係可以有適當嘅改變。」劇中吳海昕天真孩子氣，不懂如何在社會生存，有了穿越能力後，學會了幸福並非必然，更因預知死亡明白珍惜的重要。在現實中，她很信命運︰「尤其係入咗行，九成都係命運，一成係努力，命運控制唔到就唔好去諗。」
撰文：羅慧敏
攝影：沈健程
化妝、髮型：Henry Tse of BigCstyling（徐天佑）