【廣播道】王喜早前為港台節目《頭條新聞》中客串主持「驚方訊息」寸盡警隊，受到網民追捧，昨日《蘋果》見他現身廣播道港台，他透露為「驚方訊息」開工：「今日拍完聽日做後期，周五出街。」會否擔心有「變數」？他笑謂：「唔會卦，唔好又嚇我！我諗政府唔會咁準時逢星期五6點又有個記者會，搞到改喺夜晚23點50分先播。」
「香港人累積返嚟」
「財爺」陳茂波昨日發表財政預算案，宣佈向年滿18歲以上的香港永久居民派發1萬元，王喜寸爆說：「佢又冇講喺邊年邊月邊日滿18歲先合乎資格，又冇講上限，係咪即係99歲、100歲都有？如果有，高齡長者同埋啲長期卧床，以及長期病患嘅高齡長者，邊個幫佢哋申請？好多嘢都冇講，咁會令大家有好多遐想同誤會。」今次「派糖」有否紓緩民怨？王喜直言：「落咗袋先啦，上次嗰4,000蚊派咗兩年，今次點樣袋落袋係世紀之謎。」他繼續批評政府：「政府手頭上支配住嘅錢，唔係呢班政府人員搵返嚟，係過去咁多香港人努力不懈咁累積搵返嚟，不過係交畀政府託管，佢要用一個起碼大多數人都同意嘅方法去處理呢筆錢，但體制令到佢哋唔係好聽人講，惟有係許願，希望佢哋聽到。」
盼有生之年收到
杜汶澤則在fb「反建議」：「《一個中國！》可惡的港府居然讓香港人每人領1萬？公平嗎？強烈建議中國國民爭取全國14億人民每人派1萬人民幣！今天中國是世界強國！豈能輸香港！人民有難，應當與民分享超凡成果。」他更抵死地全文寫簡體字。
另外黃秋生昨回覆《蘋果》表示：「攞到咪多謝囉。」王宗堯回覆《蘋果》時則笑說：「之前嗰4,000蚊都未派，聽住先。」《頭條新聞》主持曾志豪回覆本報時笑言：「終於都識順應民意，都話跟澳門就冇錯㗎啦。」
早前剛滿65歲的蘇施黃亦在社交網暗嘲港府：「新消息，大家夠18歲未？係咪有香港身份證？咁希望大家在有生之年，香港政府會派到1萬蚊到你手上。」而她昨以短訊回覆《蘋果》：「政府咁有效率，我擔心我個行車證多啲。」為何擔心行車證？她表示：「我哋啲政府官員home office嘛，我有架車5月到期，另外一架11月。」
採訪、攝影：吳耀輝、孔志豪、李森、皓騫