周四歐霸盃32強首回合，由謝拉特帶領嘅格拉斯哥流浪主場鬥葡超球隊布拉加。格流開賽就捱打，半場落後一球，下半場開波無耐更落後至0:2，正當球迷以為輸梗之際，班波忽然踢到上晒身，憑名將之後伊亞尼斯赫傑梅開二度，同阿里布個人表演左路「一過五」後破網，熱血反勝布拉加3:2，場邊嘅謝拉特忘形慶祝，好似球員時代咁面向觀眾揮舞雙拳打橫行。賽後謝拉特話：「我哋落後嗰陣有球迷離場，但最後歐霸奇蹟之夜發生咗，我球員時代經歷過，希望以後會繼續出現。」佢又大讚今場入兩球嘅赫傑：「佢唔單止有天賦，仲有好強嘅爭勝心，係佢帶住我哋反勝，今晚係屬於佢嘅舞台，相信佢爸爸都會為佢感到驕傲。」