【本報訊】政務司司長張建宗本周三稱，武漢肺炎疫情已「受到控制」，隨即引來醫學專家炮轟。張昨就言論致歉，指自己因當時說得太快、太精簡，他只是想指政府正掌控形勢，澄清疫情現階段仍是嚴峻：「如果有誤解，我真係好對唔住。」
指講得太快太精簡
本周三張建宗在立法會特別會議反駁議員批評政府抗疫不力時指：「（可能市民）睇唔到有成績，但係你睇到疫情受到控制。」傳染病專家批評張建宗的言論，指疫情根本未受控，張建宗昨出席財委會會議前，就此番言論「跪低」，向傳媒指自己當時「可能講得太快，又比較太過精簡」，導致有誤解。
他指其實是想說「整體形勢」受到控制，「我哋正在嚴密咁監控着、掌控着，就是呢個意思。如果出現一啲誤解的話，我亦藉呢個機會作一個澄清，以及講一聲真係唔好意思。呢個絕對唔係我嘅意圖，因為我唔係專家，絕對唔能夠講一些科學證據嘅事情。現在係嚴峻嘅。」
公民黨立法會議員郭家麒質問張建宗當日指「疫情受控」是否「講大咗」，郭要求張收回言論並致歉，張指當日所指的是政府整體策略：「我哋部署嘅策略係去監察得好嚴謹，受到我哋充份控制，就係咁解，當然我可能講得唔清楚，如果有誤解，我真係好對唔住。」
■記者姚國雄