效力祖雲達斯嘅葡萄牙球星基斯坦奴朗拿度（C朗），最近為佢嘅贊助商進行一段直播訪問 （左圖），提到中國爆發武漢肺炎疫情，坦言要為中國人民祈禱，同時話效力愛斯賓奴嘅武磊係佢朋友。呢段直播係一位小朋友去到祖記更衣室同C朗作短訪，為咗宣傳新鞋，但C朗喺片段中講起佢對武漢肺炎嘅關注：「中國人𠵱家正受苦難，我𠵱家想藉呢個機會俾佢哋一個大力嘅擁抱。我為佢哋加油，為佢哋祈禱，期待今年或明年會再返到中國，嗰度係一個美麗嘅國家。」C朗喺2017年曾到中國出席商業活動時，同當時效力上海上港嘅武磊碰頭，雙方仲交換波衫，而去年當武磊射入西甲首球嗰陣，C朗亦有喺微博上出post祝賀武磊。