禮拜四三支英超球隊征戰歐霸，狼隊同兵工廠都贏波，不過曼聯作客布魯日就失威，因為擔正嘅門將羅美路一次大意出迎先失波，助攻嘅仲要係利物浦舊門將米洛列特，激死曼聯球迷，最終只係打和1:1。領隊蘇斯克查賽後就唔認球隊後防不穩，反而賴地硬話紅魔贏唔到，係因為球證執法不公，仲有布魯日主場嘅草地同比賽嗰波有問題喎。
周一大戰完車路士之後，紅魔今場有部份輪換，正選陣容同上場贏車仔換咗六個人。但開波初段完全捱打，防線仲不時出現失誤，門前險象環生。踢到15分鐘，布魯日門將米洛列特開龍門球，紅魔中堅哈利馬古尼漏頂，門將羅美路又失驚無神衝出禁區，教埋艾曼紐丹尼斯點射，一個唔該笠入空門領先。好在11分鐘後安東尼馬迪爾把握對手失誤入波，曼聯先可以首回合摸和布魯日。
逼和布魯日 蘇B怨球證
蘇B對戰果當然唔滿意，賽後亦大發牢騷。首先曼聯所失一球，米洛列特疑似未擺定嗰波就開龍門球，但嚟自白俄羅斯嘅球證古巴哥夫判入波有效，亦冇要求VAR翻睇：「VAR意義係咩？唔係睇吓個波有冇出界？抱怨雖然冇意義，但嗰球應該係角球唔係龍門球，而且米洛列特開龍門球時個波都未擺定。」
除咗執法，蘇B亦大發偉論彈布魯日主場草地麻麻，同埋個波唔係幾好踢：「今場波真係難踢，草皮同個歐霸盃專用波都好難控制。而且風又大雨又大，想踢控球在腳都唔易。」不過對方主帥菲臘基文特就話個波冇咩問題，同埋分組賽都係用呢個波，唔知點解蘇B家下先話有問題。
阿仙奴狼隊齊贏
同樣作客，阿仙奴就靠拿卡錫迪一箭定江山，1:0小勝奧林比亞高斯。賽後領隊阿迪達就大讚交出助攻嘅小將布卡約沙卡，原來沙卡雖然得18歲，但今季各項賽已有九次助攻，係兵工廠助攻王。另外，向來被人詬病嘅兵工廠後防線已連續三場冇搓失波，新一年更加各項賽事九場不敗，阿迪達賽後都讚好！
至於狼隊就係英超兵中最威，主場4:0大勝有武磊擔正嘅愛斯賓奴。前鋒迪亞高祖達連中三元，令佢成為2012年荷蘭射手亨特拉爾之後，首位連續兩場歐霸戴帽嘅球員。