出道20年、38歲嘅譚凱琪上年憑重頭劇《大帥哥》，令事業穩步上揚，但始終唔及長期飯票實際。《蘋果》噚日發現譚凱琪同拍拖多年嘅富貴男友莊日宇（Enrico）入紙排期註冊，踏入豪門做少奶奶。之後佢都喺社交平台報喜，留言：「牽着你手，直到永遠，我們即將往人生另外一個階段進發。」
譚凱琪早喺2017年透露希望喺事業上做啲成績，仲同男友講兩年後結婚。事隔兩年，佢終於兌現承諾，同大佢一年嘅Enrico拉埋天窗，正式入紙登記結婚，佢哋同樣報住深水埗。譚凱琪噚日回覆傳媒話：「多謝你呀，日子未定呀，其實我哋都想低調處理。」至於會唔會擺酒？佢話：「安排中，不過一整年都要開劇，要睇睇個期先。」佢仲話婚後會繼續工作。
拍拖買外賣
另外，日前《蘋果》影到譚凱琪同男友到尖沙嘴買韓式外賣，排隊時佢哋都戴上口罩做足防疫，揀食物時兩個有商有量，落單就由男友安排，譚凱琪蹺埋手等，可見準夫婿貼心有風度，之後Enrico攞住一大袋食物離開，另一隻手仲拎住兩支似消毒搓手液嘅物品。
事實上，Enrico十分愛錫譚凱琪，不但買樓築愛巢，仲將旗下餐廳交畀女友打理，譚凱琪亦多次表示視Enrico為結婚對象，𠵱家終於修成正果，可喜可賀。
撰文：馮仁昭