被隔離喺日本鑽石公主號上面嘅香港人，第一批成功「被回家」，不過第二批就因為包機噚晚起行失敗，大家要暫時繼續等。雖然今次唔係咩營救行動，但港府就高規格出動，由入境處處長曾國衞同保安局副局長一齊帶隊，但原來曾國衞此行係有個特別任務，就係去睇住民建聯鄭泳舜呢位攝石人。
唔識日文靠繙譯機
自從鑽石公主號要停靠橫濱港，船上乘客又上唔到岸之後，舜仔就話帶同物資要去支援救人，但佢唔識日文又似乎冇請繙譯跟身，八方睇佢fb啲片，見佢去千葉東醫院探望留醫嘅香港人未竟全功，然後就靠部繙譯機同當地醫護人員溝通，而更多時候都只係隔空望住隻郵輪同啲香港人囉！
但話晒日本確診個案急增，舜仔繼續留喺當地又確係令人覺得有危險嘅，最擔心佢嘅，原來係當日佢出戰九西補選嗰陣，造勢大會上要元秋提佢先識攬攬嘅爸爸鄭錦鐘，事關同樣去日本幫港人嘅民主派中西區區議員葉錦龍，前晚就喺東京羽田機場撞破咗曾國衞同舜仔「密斟」，最後曾國衞仲同舜仔講：「你老竇叫我睇住你，佢幾鬼擔心你。」咦，早排Popo之首PK鄧先講出口，只要大家係老友，畀隻手指公就會「赴湯蹈火，在所不辭」，今次就到入境處阿頭飛去日本，原來幫人睇住個仔，八方真係就好想知道，香港紀律部隊係咪新增咗接受私人委託服務，可以肆無忌憚咁公器私用呢？
李八方