冇錯，係連續劇「妙手仁心」播出嘅時候（大概1998年），大家反應都非常熱烈，晚晚都有好多市民趕返屋企追電視劇。呢套劇對醫學界亦都有唔少重大嘅影響。話說喺「妙手仁心」入面腦外科醫生「程至美」（吳啟華飾演）後來患上了抑鬱症，大家又記唔記得佢係點樣醫好嘅呢？
好嘢！估唔到你記性咁好！應該冇患上老人癡呆症啦。程至美醫生最終接受咗「認知行為治療」，而佢嘅抑鬱症亦漸漸康復。認知行為治療係一種心理治療，藉住醫生幫病人分析佢一啲錯誤觀念嘅真確性，從而改善病人嘅情緒。大夫好記得，我有一段時間為適合的病人建議佢哋接受認知行為治療，但係講到口水都乾病人唔肯接受治療。但係當「妙手仁心」嗰集一出街，第二日就有好多病人返嚟診所叫醫生幫佢安排認知行為治療，足見電視劇嘅影響力係幾咁大！
另外亦由於妙手仁心劇集大收，好多我啲朋友或者市民都會對醫生們存在某程度上嘅誤解，例如覺得醫生一放工即刻會揸保時捷落蘭桂坊同其他醫生歡樂時光！其實大夫上一次落蘭桂坊已經係廿幾年前！仲有劇集入邊從來唔會講到醫生們嘅日常生活，例如排隊買口罩、落街買廁紙同帶亞仔去補習等等。呢啲一般醫生都會做嘅嘢，係套戲度就絕冇提及，大夫認為呢點真係有啲離地。
唔知大家有冇留意喺劇入邊啲醫生無論係男嘅或者女嘅，真係可以話男嘅俊女嘅俏，現實究竟又係唔係咁呢？呢點唔使大夫解釋，大家都去過公立醫院或者私家醫院見到你嘅醫生，覺得又係咪真係男嘅俊女嘅俏呢？真係各花入各眼。不過嗰陣時真係有個病人，一入嚟診症室大夫都未開口，佢就猛讚我靚仔，又話我個樣好似吳啟華。雖然之後發覺佢有少少白內障，但係佢嘅讚美都令我十分之開心。
另外呢套戲亦都對醫護人員嘅勇氣同埋專業有唔少着墨，而香港醫護人員嘅專業就從來未有變過，而大夫亦以身為香港醫護人員一份子而感到驕傲。
林煒
精神科專科醫生
想輕輕鬆鬆健康啲，記住留意健康蘋台
http://health.appledaily.com.hk/