前日新民黨立法會議員葉劉淑儀搞嘅「醫護罷工苦主大聯盟」開記招，話要聲討醫護罷工，發言者之一包括譚銘其，佢出鏡後喺網上好紅，連登仲有個po關於佢，但唔係因為外貌或者口才出眾，而係席間被稱為「義務律師」，惹嚟假冒律師之嫌，連登仔仲開咗個題為「連登有無法律界人士認識呢位『譚銘其』律師？」，話「想知佢喺邊個州執業？係剛果定肯雅？」。
急澄清係法律團隊代表
八方追查下，發現前日記者會上另一台前人物、政研會林勁放話，如果有需要，苦主大聯盟不排除用法律行動追討醫護罷工導致嘅損失，佢仲聲稱呢方面嘅法律問題要交返畀譚銘其解釋：「譚先生係律師，亦都係義務律師。」
相繼被兩人稱為律師嘅譚銘其，其實一發言就話自己要補充：「我哋有法律團隊幫手，我只係一個代表，我只係以個人身份去分享。」換言之唔係律師，可能費事大家誤會，踩中地雷。但無論有冇呢位二打六，葉劉呢壇大龍鳳，成為唔少人笑柄，當記者追問聲稱受罷工所害嘅死因詳情，大家就急急腳走人，唔……大家明啦！