武漢肺炎不斷在各區擴散，大家自保，惟有留在家中避疫。「波波姐」莊端兒日前便應《蘋果》邀請，示範在家中做簡單健身操打發時間，提高身體免疫力，對抗疫情。
大叫「好爽」
新年後莊端兒的工作已受疫情影響，全部叫停，閒時在家中沉迷打機，喪吃零食，結果腹部人魚線漸漸消失，變得一身「豬腩肉」，長期打機更引致頸梗膊痛。莊端兒謂：「留喺屋企以免染病，亦可以避免增加前線人員負擔，但留喺屋企就係食玩瞓，我𠵱家生理時鐘已變咗歐洲時間，試過瞓到下晝4、5點，朝早6、7點先瞓，瞓醒又食嘢，跟住又冇做運動，好懶呀！」
健身達人陳偉成（Avis）於是上門，針對莊端兒的弊病，教她5式健身操，就地取材用礦泉水樽取代啞鈴輕鬆做gym消脂，以及用毛巾拉筋。莊端兒先做熱身運動，接着便跟Avis一同示範5式家居健身操。做完一個多小時運動後，莊端兒即大叫「好爽」，問她可會持之以恒？莊端兒說：「我唔敢擔保，但我做咗一陣，真係覺得肌肉結實咗，佢又叮囑我一定要多拉筋，可改善以往唔啱嘅姿勢。」
採訪：比華利
攝影：陳慧安
【5式健身操】
第1式：俯身側平舉
莊端兒雙手拿水樽，擘開腳站立，挺胸收腹向前彎身，腰和腳成90度，然後慢慢張開雙手提到水平線，再慢慢放下，每個動作維持約4秒，開合為之一個完整動作，每組做12到15下，可以做4組。
第2式：水樽單手划船
站在椅子旁，左手按着椅子中間，將拿水樽的右手提高做划船動作，上到盡頭就停約兩秒，然後慢慢自然垂放原位。左右手輪流做，每組做10下，可做4組，這動作可以改善腰痠背痛和寒背。
第3式：深蹲
雙腳距離跟肩膊保持同樣闊度，慢慢做出坐下的深蹲動作，如同坐無影凳，但蹲下時盡量坐後一點，慢上慢落；注意蹲下時膝蓋不要超越腳趾尖，每組做12至15下，可以做4組，勤做可練出蜜桃臀。
第4式：弓箭步
雙手合十，一腳向前跨一步，然後下蹲，將重心放在身體及後腳，上身要保持中立，前腳回來的時候盡量用力向後發力交替位置，同樣每組做12到15下，可以做3至4組。
第5式：直立向上伸展
雙手拉着毛巾兩頭，舉高雙手向上推，這是一個拉筋動作，建議每日可以做6至8下，可以做兩次，背部要有拉扯感覺。這動作可以改善寒背，變相有增高效果。