近來香港人俾疫症新聞包圍，又見住林鄭死不封關，相信都積落唔少怨氣。前晚網上有人流傳，爆料話林鄭已證實患有淋巴癌，仲係兩個禮拜前做咗手術，佢家陣每個決定都唔會考慮香港人。爆料人Annie仲tag咗林鄭嘅fb專頁，叫佢出嚟澄清。好多網友都話唔好𠱁人開心啦，叫咗「林鄭下台」八個月都冇用，佢邊有走得咁容易。八方睇完後，覺得林鄭只係冇得剪髮，個人脾氣差咗箒，邊有患癌咁誇張，喺fb畀完個哈哈就算。
爆料人稱有醫院證據
殊不知林鄭噚日朝早見記者，去到答問環節尾聲，佢竟然真係澄清，話佢自己同團隊「日以繼夜」咁處理疫情，網上謠傳係「冇根據」。佢仲苦笑兩聲，話自己雖然睇落憔悴，但健康狀況良好。
連登仔立即開po回應，恥笑聲此起彼落，話原來林鄭真係好介意。仲有連登仔突破盲腸，林鄭其實冇否認患癌，只係話指控冇根據，係咪弦外之音叫人拎證據出嚟呢？爆料人Annie傍晚再更新，話手頭上有醫院證據，畀三日時間林鄭出嚟誠實交代健康狀況。到底邊個先係真？花生都真係有排食。
李八方