肥仔K一家五口過年前到大阪地區旅行，與日本同學揸車去神戶食神戶牛，每碟5,880日圓，佢鬼咁好記性，記得2000年第一次跟屋企人去神戶吃牛肉，每碟係6,000日圓，估唔到二十年後，價格不升反跌（以日圓計），日本果然係一個沒有通脹的國家，任憑安倍晉三如何刺激經濟，發射幾多支箭，日本通脹屹立不動如山，話唔升就唔升，即使現在用負利率政策，仍然莫奈何。
正因如此，日本旅遊愈來愈旺，其他國家地區人民蜂擁往日本旅行，因為一來日本確係好地方，安全友善而衞生，一家大細在日本，不虞無端染病及唔敢上廁所，二來日本貨相對地便宜晒，香港人去到，有錢嘅直情可以扮大款，使錢使得過癮。左丁山1981年到東京公幹，到銀座赤坂住酒店，日日慳住使，望住赤坂豪宅興嘆，話自己一世人都唔會買得起（當年好似係五六千蚊港紙一呎），怎料到了2019年，香港大把年輕人到日本買三四百呎嘅單位，香港中產以太古城價錢，有資格在東京市中心買到現貨。
一個經濟大國點解會冇通脹？2008年全世界中央銀行推行量化寬鬆（QE）政策以來，點解世界性通脹仍然頑強地在2%以下？芝加哥學派金科玉律係：「通脹恒常是一個貨幣現象」，意思即係話大量增加貨幣供應，通脹必然發生，此定律在過去十年，未見發生作用，委內瑞拉、津巴布韋等獨裁貪腐國家除外。
一個解釋係新增之貨幣供應，首先進入銀行金融系統，金融界有咗大量貨幣之後，因恐怕借貸出去畀工商界會收唔番（呆壞賬），故此將新錢大量買入財務資產及只供按房抵押借貸之用（即做按揭生意），由於新銀紙多，源源不絕而來，於是財務資產之需求不斷上升，換句話講，QE推高股市及債市，股市指數迭創新高，債券價格上升，孳息率（yield）低處未算低，另一方面，按揭利率低，刺激市民買樓，於是樓價亦創新高。同一時候，工商界借錢，冇想像中咁易，不大敢增加擴容投資，人民不敢放心消費，於是物價難上漲。通俗啲講在QE時代，唔買樓揸股票就輸實，全世界貧富懸殊於是乎急劇擴闊，堅尼系數持續上升，就係咁解！一般打工仔十年前唔夠錢買樓，唔識買股票，今日更加望樓興嘆埋怨貧富懸殊，以後十年又會點？以特朗普為首之美國，一味要減息，特朗普話明鍾意負利率，佢大有機會競選連任，即係話起碼以後五年，還是要吼價格買股買樓，央行要製造貧富不均，非我哋小人物所能阻擋！