武漢肺炎初期，官員個個唔戴罩捱轟，之後政務司司長張建宗、食衞局局長陳肇始等「有咳聲」嘅官員先後跪低，戴罩見人。直至噚日，特首林鄭月娥聯同主要官員開記者會，公佈防疫工作，都齊齊戴返口罩諗住做個好榜樣，點知終於戴罩嘅林鄭，卻被網民發現亂戴罩以致「離晒罩」。
懲教生產 支援官員有罩戴
之前一直唔肯呼籲「全民戴罩」嘅政府高官噚日一字排開記招，原本係威係勢咁，個個戴上口罩之餘，亦呼籲市民要戴口罩保護自己，唔知係咪班官過去幾日無練習？唔少網民邊睇邊鬧林鄭離罩，因為佢個口罩上面嘅鐵線根本無壓實，個口罩仲喺佢講嘢期間越褪越落，見埋鼻孔遮口唔遮鼻，難怪啲施政咁離地，至今仲唔宣佈封關。而坐喺林鄭身邊嘅食物及衞生局局長陳肇始，竟然都冇提醒吓佢喎！
八方發現，各局長發言之後，林鄭終於戴返好個口罩。有網民好眼利，發現林鄭同官員戴上印有CSI字眼嘅口罩，CSI即係「懲教工業」，換言之呢批口罩由羅湖懲教所囚犯喺工場生產。政府早前出稿話，物流署去年每月平均向懲教署購買110萬個口罩，即係懲教署每月產量，而為配合傳染病應變計劃，物流署需要儲備1,000萬個口罩，以支援相關決策局同部門嘅運作需要，相信就係包括「支援」呢批官員戴罩。查實港大感染及傳染病中心總監何栢良早前都拍過片教大家「外科口罩：五戴要求、缺一不可」，林鄭唔聽何栢良封關建議，都應該學吓正確戴口罩方法啩？
李八方