武漢肺炎疫情肆虐，就連中國疾病預防控制中心主任高福都呼籲新年唔好聚會，派利是要用「電子拜年」。香港唔少區議員都有上載付款QR code到facebook呼籲街坊派「電子利是」，民主黨北區區議員林子琼（圖）亦係其中一員，點知做法惹嚟抨擊。大年初一當日，林子琼喺fb上載一個付款QR code，示意街坊可以用電子支付方式畀利是，佢喺帖文中寫道：「請繼續支持子琼嘅地區工作，或者畀利是我或者貓都得，我屋企有三隻貓」，有市民質疑佢觸犯防止賄賂條例，仲話要向廉署投訴㖭。
八方問過林子琼，佢解釋只係朋友之間擺個code，「用嚟笑吓大陸電子拜年」，所以佢都照做，承認收到街坊畀嘅利是，本身打算訂購口罩派街坊，但到𠵱家都未訂到，已經退款。佢話查過法例，相信區議員收利是同法例冇牴觸，街坊若有誤會，佢樂意解釋。