本欄曾講到阿里巴巴馬雲，順豐速遞王衛，自公司退居創辦人角色，不再做主席或首席執行官，表面上睇，係自行引退，但在內地工作近十年的會計P告知左丁山，佢聽到嘅實際理由，係「國進民退」，所有大亨大款如果把公司做得太大，被稱「富可敵國」嘅話，都會暗地裏收到訊息，好和平地退休嘆世界，盤生意自有其他人打理，如果佢唔聽話，或者聽唔明嘅又點？咁呀，唔飲敬酒飲罰酒，在北京或上海出國上機之前，被人攔住、帶走，傳出「失聯」消息，家人都唔知富豪去咗邊，跟住消息上咗網頁，富豪創辦之公司嘅股價大跌。忽然間，富豪又出現在公眾眼前，話冇事冇事，但唔肯解釋過往三日去咗邊，大家也能心領神會。自此，富豪轉趨低調，再過一輪，就話退休交棒咯。
會計P話，在內地做生意，聽黨話，跟黨走，係最基本要務，千萬不能富可敵國，真的以為自己是福布斯選出的甚麼「中國五十大影響力人物」，中國只能有一個人有影響力，就是習近平，其他人甚麼也不是。
中國歷史故事上，最有錢生意大亨鄧通，漢朝人，富甲天下，發達全靠巴結漢文帝而獲賜銅山，令太子（後漢景帝）妒忌，太子登基不久，就沒收銅礦，鄧通餓死；又有西晉石崇，積財如山，生活毫不檢點，跡近狂妄，被趙王司馬倫寵臣孫秀誣陷，一家十五人被斬。最醒就係陶朱公范蠡，稱為財神。越王勾踐復國之後，范蠡帶大美人西施退隱泛舟於湖，到齊國改姓易名，經商致富。
中國自古至今，仍是處於「趙孟能貴之，趙孟能賤之」嘅形態，朝廷揸弗人最大，邊個敢得罪，必無好結局。晚清紅頂商人胡雪巖在保家左宗棠死後開罪李鴻章，下場就係旗下銀號被擠提，無人加以援手，卒破產而告終。現在已經進步咗嘅嘞，除非搞政治，有野心，否則還可以揸弗全身而退。拎住幾百億元身家暗地裏移民外國，得以在外國享受平安晚年，唔再被鬥垮鬥臭。馬雲等人以後泛舟西湖，唔涉及政治，仍可以被視為黨國外民間外交棋子，去同特朗普握手嘅！
會計P話內地生意做到千億以上，就會招來監控，首席執行官皆受關注，並有國家隊基金買入大量股票，將公司半國有化，貫徹國進民退嘅宗旨。有自身問題嘅，邊有得退休咁好彩，強力部門會介入㗎！