孭住官司踏入鼠年的王宗堯，早前穿上黃衫到淺水灣鎮海樓公園進行祈福膜拜，還即興舞「黃獅」，祝願大家「招財進寶保平安，黃金獅子賀新春。」他說：「上年冇乜着其他顏色嘅衫，咁新年就着啲令自己心情好啲嘅顏色。」
感激父母諒解
過往的農曆新年，王宗堯會周圍拜年，不過他突然想到今年要特別小心，笑說：「嘩，今年拜年有啲難，過往有唔同嘅朋友圈搞過年飯、開年飯、去朋友屋企拜年、行年宵，但今年會少咗，因為有啲朋友喺平行時空度生活，政見唔同，今次分野就好大，可能直情連拜年都唔想搵佢，今年會慎重考慮呢樣嘢。」
對於去年以涉嫌串謀刑事毀壞及進入或逗留會議廳範圍罪名而被捕，案件押後至下月13日再訊，不過王宗堯未有擔心，他說：「相比好多人，自己單官司好渺小，好多人同樣為呢件事有好多無理嘅拘捕，例如有個外賣速遞員被拉，我希望我單官司可以變為一個案例，畀後面嘅人參考。」但提到家人的擔心，王宗堯很感激父母的諒解，「好多人嘅屋企，因為政見而令親情疏遠。」
談到鼠年願望，王宗堯表示：「過去嘅一年，我係少咗好多個人嘅期望，反而想大環境會好，無論最後嘅結果係點，希望件事令個地方有返啲生機，就算有啲官員話過去兩、三年好平靜，但嗰種平靜有啲似死水，慢慢萎縮，越嚟越冇希望，反而過去嘅半年，香港多番好多愛，對呢個地方嘅認同，呢樣嘢係最緊要，無論點都好，做好咗個地方先，所有人最後都係想有番個自我身份嘅認定。」
唔想拖累舊愛
對於舊愛蘇皓兒（Chloe）曾對他不離不棄，最終分手收場，王宗堯坦言感到很可惜，他希望過一段時間再與舊愛溝通。是否想復合？他說：「可能呢半年，喺感情上嘅投放比較少，呢段時間自己都唔可以去得邊，相對地出去散心嘅機會都少咗，希望等到2月有個定案，始終有官司在身，我唔想拖累人。」
採訪：黃曉妍
攝影：陳慧安