西甲雙雄巴塞隆拿同皇家馬德里今季經常輪流失分，到家陣都拋離唔到其他西甲球隊，上周六巴塞又出事，作客華倫西亞就算球王美斯全場11次起腳，但竟然一球都入唔到，久攻不下仲失兩粒畀對手，最終0:2落敗，喺聯賽榜維持得43分，造出近13季以嚟踢完21輪聯賽後嘅最低分數，睇嚟炒完華維迪換個施迪安接手，暫時都見唔到有乜唔同。
新帥怪球員唔了解戰術
巴塞上半場唔失波認真好彩，因為碧基禁區內犯天條，華倫曾經獲得12碼，但麥斯高美斯竟然宴客。不過，呢位今季由切爾達加盟嘅前鋒，下半場將功補過，喺48同77分鐘連轟2球，協助華倫以2:0戰勝呢支強敵，更加係2008年西班牙盃4強後，首次喺自己主場贏巴塞，連埋上屆西盃決賽贏巴塞捧盃場波，睇嚟近年都有啲巴塞剋星嘅味道。
其實上任後領軍第二場就輸波嘅教練施迪安，賽後已經總括咗一啲敗因，其中一樣就係太多無謂傳球；佢哋全場控球率高達74%，傳球次數亦比對手高出三倍，但華倫就把握佢哋一啲犯錯而入波。施迪安就怪球隊可能未完全了解佢嘅戰術，仲話可能自己解釋唔清楚，但我求大俠同部份球迷都覺得，佢唔好得過華維迪幾多，尤其臨場調動見唔到有幾出色，但有一樣嘢就可以話佢唔好彩，就係蘇亞雷斯受傷後，前面冇人可以幫到美斯，所以今次話就話美斯一個人起腳射咗11次竟然冇腳中，但最主要係基沙文或安素法迪班隊友幫唔到佢製造空間，結果好多波都係夾硬射。
近16季失球最多
巴塞輸波後繼續有43分喺手，但就係近13季21輪賽事後嘅最差成績，對上一次21輪得43分已經係06/07球季，季尾亦只得亞軍（見附表）。另外，佢哋今季已失咗25球，係03/04球季以嚟21輪後最多失球一季，所以今季要稱霸都唔係好樂觀。