伊利錫上周六喺阿特蘭大作客以7:0血洗拖連奴嘅意甲大演「帽子戲法」，當中包括下半場喺中圈附近快開罰球笠入空門嗰球，佢賽後就話入呢啲波要靠運仔。今場伊利錫喺17分鐘就為阿特蘭大開紀錄，而喺球隊半場領先3:0下，佢再喺53分鐘喺中圈附近快開罰球算笠入空門，加埋一分鐘後入多粒，今場就連中三元，係2018年以嚟第4次「戴帽」，歐洲五大聯賽中得美斯（7次）同阿古路（6次）同期多過佢，真係威水！伊利錫喺拖連奴兩件後衞褪緊後，門將沙華托尼施利古又唔喺龍門線嘅情況下把握機會射入罰球，佢話︰「我睇到佢哋位置有問題，第一個諗法就係要入佢，點知真係入！我有運呀，踢波係要啲運仔。」