今日年初三己巳日，係歲破日，大事不宜，點解係歲破呢？因為巳日屬火，而己亥豬年仍未過（二月四日立春後先至係庚子年），豬年是亥，亥屬水，水剋火，水火不容，今天是火日，故此巳亥相沖，日與年沖，是為歲破日。
本來年初三俗稱赤口，不宜拜年，以免口舌招尤，故此阿爸教落，今日最好郊遊（以前冇大型商場吖嘛），左丁山就一定係入馬場嘅嘞，年初三跑馬，沙田馬場必定人頭湧湧，加上香港人慣咗年初三拜車公，拜完車公轉運，乘機入馬場搏殺啦！今日吉時係午時（11點至1點），就晒入廟之人，拜完時間啱啱好，馬場開跑第一場。不過你識計時，人又識啫，交通必定繁忙，趕時間未必可以盡如人意。
過年前，一位朋友D太去黃大仙還神，順便求籤，居然問橫財就求到支上籤，喜不自勝。捉住一位股票分析師問買乜股票好，分析師順口叫佢買ATM，唔係提款機呀，係阿里巴巴、騰訊與美團，三隻都係新經濟股，股價不斷上升，升得多，D太又心驚驚，怕摸頂，難下決定，年廿八在街上碰上左丁山，又再問：「買邊隻好？」左丁山答：「買邊隻都好啦，呢啲股我較鍾意AT，M其實係做送外賣生意，增長易受實際環境所限制，未來增長速度較易放緩，騰訊係手遊股，網上遊戲易受中央命令限制，買阿里巴巴啦，最緊要長揸，呢隻中國亞馬遜，在內地夠晒積極，14億人市場，搞網購長做長有。」
同D太講完，次日碰到自大陸回歸香港打工嘅會計P，會計P初時上大陸做核數師，後來被客戶睇中，招攬佢做CFO，在北京凡十年，去年12月決定唔做，返香港打工，由於佢係CPA，有豐富內地經驗，即刻搵到新職位，做一間地區性公司Regional Controller，問佢點解放棄大陸，返嚟香港。呢位會計P講：「人開始老，厭倦上面成日要吃飯飲茅台，陪銀行及幹部高層風花雪月，佢哋嗰套辦事方式，有時好難頂，趁我還有市場價值，快啲返嚟搵份工做到退休好過。」會計P指出，名字唔敢講，有幾位大老闆因為太揚，曾被中央監控，失聯幾日，復出之後，個個由高調變低調。出名嘅馬雲與王衛夠醒，皆已自願分別淡出阿里巴巴與順豐，大家都知道急流勇退嘅道理。點解要退？講到明就煩，中國政治經濟不可分，你估真係可以畀你民企做到too big to fail咩。