賀歲片《家有囍事2020》將於明日大年初一上映，今次已是《家》片系列的第四部，戲中秉承過往傳統「齊歡唱，同慶賀」，老土得來甚有農曆新年氣氛。日前《蘋果》找來片中演員包括張智霖（Chilam）、張繼聰、周秀娜、陳靜（DaDa）和黃百鳴聚首一堂圍爐吃團年飯。
謝安琪打點一切
除黃百鳴外，其餘四位演員均是首次拍《家》片系列，Chilam說︰「之前係Leslie（張國榮）做過，佢係我偶像，而我又做到佢個角色。我同阿聰又係姓張，大家都好啱key，兄弟一樣。」對於團年飯，他們異口同聲表示很重視，張繼聰說︰「細個唔識珍惜，大個先知重要，我哋會成個家族成員一齊食團年飯。」身為上海人的陳靜就說︰「一定會有甜食，如八寶飯，同有酒一樣咁重要。」
跟三位已婚男士談到會否幫太太辦年貨和大掃除？黃百鳴說︰「我一定唔會，屋企嘢係太太負責，我蹺埋手等食。」Chilam聽後不禁說︰「真係要學習，我唔係㗎，我好似做晒，煎糕又係我煎。」而阿聰則謂︰「我就完全冇參與。」阿聰大讚老婆謝安琪將屋企事處理好，他只會派利是。
不少藝人都會買桃花催旺人緣，問到他們會否買桃花？Chilam自爆說︰「都係太太買，但有時佢會唔買，唔知點解？可能睇我嗰年桃花旺唔旺，見你今年幾乖就買棵畀你玩吓。」阿聰則謂︰「從來都冇買桃花，怕小朋友細推跌，反而會有細細盆嘅水仙花同桔。我就保持全年好體格，就係為咗新年嗰幾日，食年糕、蘿蔔糕放題。」問他可有學整糕點？他說︰「絕對冇，廚房係女人嘅天地，唔好搞人哋個地盤，專心食同畀反應。」Chilam聽後一臉羨慕的說︰「因為我太太完全唔識整嘢食，見到你哋好羨慕。」
DaDa搽紅色指甲
至於兩位單身女士，會否新年一定換新衫，尤其穿紅色內衣助來年行好運？周秀娜說︰「新衫一定會有，內衣……都會有啲紅色嘅。」阿聰即笑說︰「好私隱。」Chilam更搞笑掩面說︰「好有畫面呀。」而DaDa表示不一定在內穿紅色，可能會搽紅色指甲油。說到新年願望，周秀娜邊笑邊說︰「大家都身體健康，而我就少啲肚屙，識番個好男人。」原來周秀娜腸胃不好，有開工拍戲時遇上肚屙，阿聰笑她︰「佢最專業，會食啲道具食物。」Chilam再發揮搞笑本色，向娜姐說︰「祝你出入平安。」
採訪︰羅如文
攝影︰沈健程
場地提供：盛天餐管