武漢新型肺炎疫情全面擴散，香港好多市民唔等政府呼籲，一早已經自發戴口罩，保護自己之餘亦令其他市民安心，不過署理特首張建宗噚日喺行會前出嚟回應疫情，佢講講吓忽然係咁咳，咳到連聲都變埋，八方忍唔住問小肥張使唔使戴返個口罩，點知小肥張係咁話自己冇事，係都話唔使戴口罩，真係都幾令人擔心。
話飲水濁親
話說噚日朝早小肥張見記者，佢喺開場發言後即飲咗三次水，當時八方唔覺有乜嘢，直至小肥張被記者追問會唔會呼籲香港人唔好去武漢，佢唔肯正面回應，之後突然係咁咳，後來仲好似因為咁令喉嚨不適，變晒聲呼籲巿民最重要係注意個人健康，如果身體不適應該戴口罩或睇醫生。一個咳緊同變聲又唔戴口罩嘅人，竟然叫人有病要戴口罩，你話幾咁諷刺！
小肥張之後答問題嗰陣，仲三次大聲咳同索鼻，要用毛巾抹嘴，八方見到咁「嚴重」，就問小肥張係咪身體不適，佢笑住話自己冇問題，只係飲水濁親，又多謝八方關心。當有記者追問佢係咪需要戴返個口罩，佢亦只係不斷話：「冇事啊，冇事啊，唔使擔心！」不過其實有人留意到，運房局局長陳帆噚日現身特首辦嗰陣有戴口罩，有人問小肥張係咪政府高層官員有人患病，小肥張話冇留意啲同事有病，仲話同事噚日個個狀態好好。其實作為問責官，喺目前局勢吓應以身作則戴口罩，不過班惡過官嘅差人仲死撐要蒙面法，可能小肥張怕戴口罩，又會俾員佐級林大總統發信批評。
李八方