曼聯門將羅美路（小圖）周一早上，喺去緊卡靈頓訓練基地準備出席操練途中遇上車禍，佢揸嘅林寶堅尼跑車撞咗公路嘅圍欄（圖），好在佢本人冇受傷，之後仲可以繼續出席操練。羅美路周一上晝喺距離訓練基利約一英里嘅Carrington Spur Road自炒，佢揸嘅林寶失控撞咗埋圍欄，不過呢位阿根廷門將好在冇事，仲可以自己走出車外。據BBC報道話，羅美路喺車禍現場同警方錄完口供後，就繼續去卡靈頓參加操練。英媒仲透露，羅美路炒咗嘅林寶喺2017年買入，價值約17萬鎊（約171萬港元），呢排曼徹斯特都幾凍，羅美路呢次炒車可能同路面結冰有關。