【本報訊】兩年前，新界鄉議局主席劉業強到車公廟為香港求得41中籤。那年，解籤師傅陳天恩曾狠批兩支籤都是「衰籤」，更預言「香港市民將會有一次暴亂」。結果那年暴亂沒有發生，沒料到去年6月反送中運動展開後，許多香港人度過多個難眠之夜。即將踏入庚子鼠年，劉業強會為香港求得一支怎樣的籤文？陳居士預言：「除非將籤筒入面嘅籤換晒佢，如果唔係冇可能會有好籤。」
記者：李雨夢
2018年的年初二，劉業強為香港求得41中籤，籤文為「攝衣欲過灘頭海，轉計回來怕濕身，人若不信辛苦事，何能取得保安寧」，解曰︰凡事小心，自身平吉，求財吉利，家宅後吉。當年陳天恩指，無論是41籤或司儀宣佈的21籤都是「衰籤」，更一度預言香港或會出現暴亂。
陳天恩兩年後接受《蘋果》訪問，他說當時有很多人都以為他在開玩笑，再次回顧籤文，陳說「你睇攝衣欲過灘頭海，轉計回來怕濕身呢兩句，就係樣樣嘢都驚，咁邊會有成功？當時林鄭話要令到香港非常繁榮，佢有冇真實去做過呢？佢自己都冇，邊度會成功呀？咪盞俾人哋踩囉，我就話一定會有暴亂，搞到佢自己周身唔掂」。
預視香港前景極差
去年劉業強在車公廟求得86中籤，籤文為「石田為業喜非常，畫餅將來未見香；怎曉田耕耘不得，那知餅食不充腸。」解曰︰出入謹慎、家宅不吉、自身平安、求財不遂。去年陳天恩形容籤文預視香港未來一年形勢非常之差，更曾揚言︰「（香港）來年有好日子過，斬我個頭當凳坐！」
想起去年的豪言，陳天恩只嘆「舊年我話林鄭會衰到貼地，以人頭擔保，都冇人信，個個都話我輸梗個人頭，嗰時個氣氛好多人都唔會相信，諗住邊度會有事吖」。當時《逃犯條例》修訂仍未推出，但他斷定86籤比前年的41籤更「衰」，「衰好多倍，石田為業喜非常，石田係唔能夠耕種，明指香港走到去一個盡頭，畫餅將來未見香，畫出嚟嘅餅都唔食得，大家只能夠望梅止渴，喺咁嘅情況下，市民心態會點呢？」
對於來年香港運程，陳天恩預言將會「好淒涼，我同香港推算過，喺經濟方面一定比舊年差，一路走向谷底」。面對絕境，他認為解決之途只有林鄭月娥下台，「（保安局局長）李家超、（律政司司長）鄭若驊兩位跟住落埋台，搵一位能幹嘅上嚟」。陳天恩指車公籤文非常靈驗，鼠年年初二劉業強將再次為香港求籤，他說：「除非將籤筒入面嘅籤換晒佢，如果唔係無可能會有好籤，絕對無可能。」
記者曾致電鄉議局秘書處查詢年初二求籤安排，秘書處回覆指劉業強會繼續到車公廟求籤，目前安排如常，但未知屆時保安會否因應近期社會事件而加強。