一般人睇藍色報紙，以為餐飲業死到直晒，了無生氣，飲食業失業率一定大升。左丁山見到老友餐廳R個愁眉苦臉樣子，亦都以為係咁。點知呢晚同一位地區飲食業老闆S食晚飯，佢話左丁山呢類中環人堅離地，淨係在中環銅鑼灣灣仔名店出入，不知市場現況，佢挑戰左丁山：「你對沙田咁熟，呢幾個月去過石門食晚飯未？」左丁山即時口啞，好耐好耐以前係去過石門之萬豪Courtyard酒店食自助餐，但家人覺得不外如是，以後冇再去，唔知石門有乜好食。老闆S講：「我成日做飲食研究，捐窿捐罅都去食，呢六個月在不同時段去過石門幾趟，都幾嚇人。石門有一個商場，內外有過百間食肆，生意十分暢旺，星期一至星期日都冇位，停車場永遠爆滿，出面馬路全部違規泊車，甚至泊雙行（double parking），你知啦，依家警察邊度會理嘅唧，你真係要去過先至能夠明白墟冚狀況。嗰度一啲餐廳老闆拎到李超人派錢六萬，當然開心，但只係錦上添花咋！」老闆S講到咁巴閉，於是問佢咁多食肆，有乜正嘢最正斗，老闆S大大聲講：「嗱！我試食過，起碼有三間好過中環灣仔名店好多，一間賣清湯腩，係食完唔想去九如坊歌賦街，一間賣點心（蝦餃燒賣等等）直情要攞米芝蓮星，我敢講佢一定好過添好運，第三間賣燒鵝，吃過係唔使去威靈頓街、史丹利街及灣仔街市旁邊。」嘩，講到咁巴閉，一定要去試吓，但冇法子泊車，點好？老闆S話：「唓，好易啫，坐馬鐵到石門站落車行過去之嘛，坐的士去亦得，反而揸車仲麻煩，依家好多沙田友都由大圍，沙田市中心一帶走咗去石門覓食，邊個敢話飲食業淒慘低迷呀！你呢啲中環友，直情要去貼地氣。」
所以話呢，地區性餐廳反為好過油尖旺/中銅灣，呢啲傳統繁盛地段，一連串示威行動令到地區居民重新認識本區，例如沙田人在沙田，荃灣人在荃灣，諸如此類。嗰晚校友K帶左丁山到沙田第一城後面小瀝源區之一間新酒店，叫做Alva Hotel（帝逸酒店），左丁山心諗，新地起酒店揀在呢個地段都算大膽，用一般術語講，係極具挑戰性。反為校友K認為交通方便，佢家住鰂魚涌，有巴士（走東隧，大老山）直達酒店，揸車出大老山隧道落嚟就見到酒店，由九龍塘到大圍，坐馬鐵到沙田第一城站行過去亦方便，由石門走路過河到酒店約六分鐘。入去一睇，酒店大堂有氣派，再去地下自助餐，居然全場爆滿冇位，訂位亦要訂到一月尾。於是與校友K到中菜廳，面積不大，夠清靜舒服，食物有水準，如能維持落去，沙田人消費力強，呢間Alva酒店之F&B，有得做。搵酒店住客就真係要靠大形勢嘞。