【黑鏡線索】
前中共駐香港最高領導人許家屯，喺回憶錄講過幾次，一國兩制，係發明嚟統一台灣。統一台灣，中共兩手準備，一係打，一係，就用一國兩制去sell到台灣自願統一。
香港做示範單位
話就話兩制，好似好自主，但而家事後大家都知，兩制只係甜頭，一旦跌咗入一國嘅籠入面，就忽然變成內政，大條道理點玩都得，總之就入得唔出得，實際係吞併，唔係共和。
中共曾經覺得，當年sell畀蔣經國，有機會令佢落叠，點知冇幾耐蔣就死咗，繼任人係李登輝。中共發現，李登輝條路，同統一越行越遠，要和平統一，急唔到。
香港同台灣唔同，根據許講，中共知道台灣唔易收復，但香港，中共就覺得老奉實收得返。所以喺香港行一國兩制，第一大意義，係做個示範單位，好好睇睇，𠱁台灣人落叠，到時就大陸香港澳門台灣，一國四地，和平統一，民族復興。
台灣大選向中共說不
第二個意義，當然係香港確實係識得生金蛋，中共當然亦想香港繼續生。所以許家屯堅稱中共係真心想保持香港嘅制度，因為中共都有着數。問題係，就如清末乜嘢中學為體西學為用謬誤一樣，中共以為，香港人嘅經濟權利同政治權利，可以分開處理，所以後者一再走數。
走數走到2019，終於香港爆炸，香港人喺變相公投，清楚選擇企喺極權嘅對面，叫醒埋台灣人，喺2020台灣大選清楚拒絕一國兩制。於是，中共最想sell嘅台灣，冇得再sell。而中共眼中，香港啱啱做咗個完美嘅反面教材，當然冇需要再扮乜嘢示範單位。
咁香港人呢？民調顯示，香港支持台灣獨立嘅人，第一次過半。至於一國兩制，呢頭先勸完台灣人向毒品說不，梗係冇理由自己仲繼續擁抱。上一篇文我本來寫咗句「落實一國兩制」，交完稿越諗越覺得自己膠，嗱嗱臨勞煩編輯幫手鏟咗佢，諗起都滴汗。
於是，一國兩制，發明三十幾年後，嘭一聲，可以宣佈破產，就算唔係即時生效，都係the beginning of the end，就如雷曼兄弟爆煲之後嘅迷債，個朵已經臭晒，至少唔可以用同一個名再呃人。
進入後一國兩制、中美冷戰時代，既然唔再信一國兩制，合理發展，就係諗「脫中入世」。脫中可以由自己做起，第一步，係摵甩「中國人」定位。
《與中國無關》台灣作者范疇，話自己中二嗰年去咗新加坡讀書，叫啲同學做「華僑」，點知咁都俾人打咗兩下，原來佢啲同學，話自己係「新加坡人」，或者「新加坡華人」，最憎人話係「華僑」。當時新加坡其實獨立咗只係四年，中二生都咁識得對抗大中華膠主義，可見當地嘅脫中化做得幾成功。
新加坡用政府力量宣傳脫中，香港傀儡政權當然唔會做，咁咪自己做。簡潔啲，叫自己做「香港人」，懶仔細，可以叫「香港華人」、「香港猶太人」、「香港印度人」等等。要凝聚出一個身份認同，血緣好次要，最重要係共同價值觀，以前未必咁覺，到咗今日，已經成為深刻嘅教訓。
撰文：宋漢生
fb : sunghsblog