組合MIRROR成員姜濤同Anson Kong（江熚生）噚日喺屯門為美容零售店擔任剪綵嘉賓，宋熙年做司儀。姜濤同Anson用針筆拮爆大會預先準備嘅氣球作為開幕儀式，姜濤顯然有「爆波恐懼」，未拮爆波已驚驚，預先縮後迴避，唔知係咪怕整到塊臉，事關佢之後受訪時，就Anson話幫女友吹頭「係sweet嘅事」時，佢認真話就算有女友，都會拒絕為對方敷面膜同吹頭：「呢啲係好私人嘅事，對於面要小心啲，我唔會幫手。」姜濤仲話皮膚保養得宜，最重要係爭取足夠睡眠時間：「我最長時間接近瞓足一日，起身碌吓個電話再瞓。」
擺阿媽上枱
前晚港台《十大中文金曲》姜濤奪得「最有前途新人」金獎，MIRROR奪得銀獎，姜濤被Anson叫請隊員食飯，有指姜濤今年豬籠入水，姜濤話所有收入都畀晒媽咪，佢話：「媽咪先清楚我收入，佢視乎心情畀幾多零用錢我，如果同佢嗌交，會被經濟封鎖。」
撰文：馮仁昭