9月舉行嘅新一屆立法會換屆選舉，民主派除咗想喺五區地區直選搶灘，亦全力進攻功能組別，希望打破部份一直俾建制派壟斷嘅界別，飲食界係其中一個主戰場，而喺「黃色經濟圈」帶動下，近期積極推動飲食界功能組別選民登記嘅香港中小企食店聯盟召集人及香港美食車聯盟主席林瑞華（Gordon），近日已經加入公民黨，佢亦不諱言有考慮挑戰張宇人飲食界立法會個位。
林瑞華係火鍋店「616七桌子」合夥人，民陣舊年搞12.8遊行，仲沿途派菠蘿包為市民打氣，元旦遊行時又設街站推動飲食界選民登記。
林瑞華同八方講已經加入公民黨，佢認為公民黨係抗爭運動中都企得好前，舉例如陳淑莊更因為參與雨傘運動而被檢控，新一屆甚至未能再參選，佢係好認同公民黨追求民主嘅理念。
積極推動業界登記選民
作為飲食界中人，Gordon希望喺所屬界別貢獻更多，所以舊年已經開始推動業界選民登記，唔想再畀自由黨張宇人壟斷飲食界個位，但佢話推動業界登記難度亦大，因為無論係黃店抑或藍店，其實都唔係好知個登記程序係點，例如填乜表格，所以到現在要光復飲食界仍未許樂觀，但佢表明會同義工團隊會盡力做，繼續「洗舖」喚醒業界關注，至於係咪親自上陣挑戰預料爭取冧莊嘅張宇人，Gordon不諱言有考慮，但就強調仲要睇多方因素，例如係咪仲有其他人想出戰。
李八方