呢排遊行同示威少咗，差人同藍絲可能見冇人畀佢哋搞，藍絲就轉移目標日日走去做撕紙狗，走去撕街坊整嘅連儂牆，班差人就好落力咁晚晚捉貼連儂牆嘅街坊。不過香港咁大、手足咁多，即使差人、防暴為捉貼連儂牆嘅市民無底線ot，都捉唔到咁多，日前就有人喺fb同討論區瘋傳，有市民喺連儂牆貼大型抗爭賀年揮春，又靚又有意義。
網民倡設區會連儂牆
八方見到網上話，呢個貼賀年揮春嘅連儂牆，地點係坑口景林連儂隧道，有手足用N咁多張A3紙，印晒做賀年文宣，貼滿晒成條連儂隧道，而且睇得出設計好有心思，大讚手足好勁，而且每張文宣內容都唔同，明顯即使遊行示威少咗，文宣手足都冇停落嚟，繼續整新文宣出街，亦有網民話唔止坑口有賀年抗爭文宣，其實其他區都有，之後仲貼咗個屯門區影到嘅賀年文宣㖭。
好多網民話坑口景林連儂隧道嘅文宣，相信好快俾班差人同藍絲破壞，但亦有人話唔怕俾人破壞，一於撕幾多貼幾多，而且好多區議會都研究緊整區會官方連儂牆，到時邊個撕就可告邊個。
同手足文宣相比，藍絲、建制文宣，即使用幾多錢做，始終有種土味，最近更變成有「屎味」！日前有網民發現民建聯喺街掛嘅「一團和氣」賀年直幡，原本咁睇冇乜問題，但係背面睇，「和氣」兩隻字變成好似「屎味」字樣，原本祝市民「一團和氣」變成祝市民「一團屎味」，真係倒米！不過又有網民話，其實「一團屎味」幾啱民建聯呀，佢哋只係講出事實真相！
李八方