後生可畏！上個禮拜六德甲歇冬後重開嘅首周賽事，多蒙特作客鬥奧格斯堡。「蜜蜂兵團」一度落後1:3，不過56分鐘換入新加盟嘅艾寧夏蘭特之後，劇情就180度改變。呢位19歲小將上陣僅20分鐘就成功大演帽子戲法，幫多蒙特後上反勝對手，仲成為咗球隊史上最年輕連中三元球員，認真犀利。
前一日因為魯爾區宿敵史浩克04贏波，所以多蒙特賽前被對方爬過跌落第五。全力爭勝嘅蜜蜂兵團上半場就吃一記悶棍，奧格斯堡有尼達列治拿34分鐘先開紀錄領先。易邊再戰後，主隊再有馬高列治達建功拉開比數，雖然其後多蒙特靠祖利安白蘭特勁射近，但55分鐘被尼達列治拿射入今仗第二球，落後至1:3。
奧格斯堡又做苦主
落後兩球下，教練法夫利決定換入冬季加盟嘅艾寧夏蘭特，呢位19歲嘅挪威射手上陣僅3分鐘就接應查頓辛祖嘅直線傳送起左腳射入追近，兩分鐘之後查頓辛祖禁區內建功扳平。之後就繼續夏蘭特表現時間，首先70分鐘接應杜根夏薩特橫傳門前射入空門，跟住79分鐘再接應馬高列奧斯嘅傳送禁區內射入，上陣短短廿分鐘就已經戴帽，仲幫球隊反勝對手全取三分。
本身今季出戰歐聯已經打破多個紀錄嘅夏蘭特，一嚟到德甲又再創歷史。首先佢後備上陣連中三元，成為德甲史上首位後備登場戴帽嘅球員。同時間，佢亦都以19歲之齡成為多蒙特隊史最年輕連中三元嘅球員，上一次地標戰就已經連中三元嘅多蒙特球員，就係家下效力阿仙奴嘅奧巴美揚，13年奧巴首度為多蒙特上陣都成功戴帽，苦主咁啱都係奧格斯堡。賽後呢位挪威超新星接受德甲官網訪問就表示，自己嚟到係為咗爭取入波，「對我嚟講係一個超好嘅開始，我哋要逐場逐場嚟，之後大家就會見到我哋嘅表現。」同晚RB萊比錫主場3:1反勝柏林聯穩坐榜首，近9場聯賽都攻入對手3球或以上，認真得人驚。
曼聯增兵冇進展
喺夏蘭特連中三元之後，雖然令到多仔球迷興奮，不過曼聯迷就一片哀鳴，事關當初有指紅魔有意羅致夏蘭特，但最後又係無疾而終。見到夏蘭特嘅好表現，唔少曼迷都認為愛隊又一次走寶，加上家下買士砵亭中場波基斯費南迪斯又未有進展，魔迷們好難唔沮喪。