早排TVB投訴話去採訪反送中遊行時候遭人阻攔，威脅新聞自由。
鏡頭影地下後熄機
噚晚維園年宵開鑼，TVB新聞有派人去現場做直播，今次冇示威者、冇市民阻攔採訪，但TVB個直播做做吓竟然要將個鏡頭影落地下，之後仲cut埋直播！為乜事呢？原來係唔想影到現場市民做「五大訴求、缺一不可」手勢（圖左）。
話說TVB記者徐子瀅喺維園年宵做現場直播，今次絕對冇市民阻攔佢哋採訪，不過有市民經過鏡頭前，即刻舉起五隻同一隻手指，做「五大訴求、缺一不可」手勢，又有市民指住自己頂「光復香港」帽，亦有拎住反送中揮春行過，八方見個鏡頭不斷左閃右避，總之就唔畀呢啲畫面入鏡，後來避無可避，竟然將個鏡頭影落地下，仲即cut埋直播。其實八方睇到條片，市民都係過鏡式行過，完全冇影響個直播，CCTVB使唔使怕成咁呢？