去年區議會選舉人所共知，建制派大敗，原因只有一個，就係因為佢地撐修例、撐警。「蘋果日報」數天前報道，一名全無政治經驗嘅「素人」陳梓維竟然爆大冷擊敗民建聯大哥葉國謙嘅姪兒葉傲冬！而陳梓維只用1萬3千元做競選經費！用賽馬術語嚟講，投注1萬3千元，獲得一個任期四年，薪酬總值近乎二百萬元嘅區議員職位，賠率係153.8倍，夠高未？但最值得檢討嘅當然係葉傲冬，點解會輸畀一位冇錢冇經驗嘅新仔手上！
建制派敗得如此慘烈，令好多人措手不及，朋友B來電：「喂，你識區議員H㗎，佢想搵工，你幫手問吓有冇機會得唔得，例如政治公關、政治遊說嗰類。」講得太清楚恐怕令區議員曝光，無謂講咁多，區議員H以前同左丁山見過面，對經濟分析幾在行，可是後來加入一啲老細陣營，雖則在區內無功也有勞，一樣輸畀一位泛民素人。於是佢班老友要幫手同佢搵一份工，做慣區議員，能轉行做乜工？真難諗，1987年股災後，大把賓架失業，美國傳媒稱失業賓架為unemployable（周身刀冇張利又唔多識營運管理，做慣刁之人往往得把口），左丁山都驚過一陣。做區議員愈耐，就更與商界脫節，只宜去NGO搵工，但NGO往往缺乏經費，難得有空缺，都幾傷噃。
區議員助理仲弊，議員連任失敗，自顧不暇，助理要搵新工，更是有苦自己知。聖誕聚會中，遇到一位泛民議員助理A小姐，佢話自己算夠運，老闆成功連任，但有同學係建制派議員助理，變成樹倒猢猻散，十分徬徨。
不過，民建聯有的是錢，正努力同落選區議員搵工，南華早報（12月30日）報導，民建聯拼命安排工作畀一共二百位落選議員及助理，務求穩定軍心，維持地區樁腳，部署2020年立法會選舉，以免遭受同樣毀滅性大敗。200份新工喎，去邊度搵？人地係有辦法呢，民建聯下一代新星葉傲冬，雖然輸咗畀新仔，仍然會留在佐敦不走兼且在大公文匯媒體集團返工喎。A小姐亦知呢個消息，佢同左丁山講：「民建聯係財雄勢大嘅，好多落選區議員仍然有租交，留番個地區辦事處，有啲月租六萬，仍然唔肯放手，搞到我地泛民新議員好難搵到新辦事處，而且某些位置要月租六萬，泛民邊度afford得起。」經佢一提，先至想起，上述之求職議員H並非民建聯成員，唔怪得要自己周圍搵出路！民建聯／工聯會之政治關係如盤根錯節，死而不僵，大概要佢連輸兩屆區議會、立法會選舉，先至可以動搖佢根基，泛民有無此能耐，屢戰屢勝？