社會抗爭運動持續半年之多，一班年輕人集氣創作《山下見》盡表手足鼓勵之情，一句又一句歌詞加上節奏鏗鏘有力來表達同行心聲，主唱Hugo日前受訪時表示歌曲在理大之戰一夜誕生，希望以歌送暖安撫半年以來回家路上的戰友，他跟其餘四位Retroll HIP HOP成員Heartgrey、Angus、Jerry、繼文立場一致鮮明，五子繼續做個真香港人，為社會發聲，Jerry更稱「寧死不屈」。
五子早前參與ViuTV《全民造星II》真人騷，Hugo一直憑特別個人唱功及妖艷形象跑上十強，決賽當晚夥拍Retroll HIP HOP四位成員將原創歌曲《山下見》搬上舞台，歌詞中「與綠魔交戰」、「打破嘅雞蛋一隻又一隻」、「時代力量會不會成功，團結一心不要忘記初衷」，及後最尾一句「rest in peace」最觸動人心，願運動中犧牲者安息。日前五子在觀塘錄音室拆解歌曲由來，在錄音室天台重演《山下見》誕生一幕。
內地只係其一
《山下見》一曲靈感來自Hugo，他說：「玩到十強時我想拉返兄弟上嚟，一直想作一首rap歌，hip hop歌都可以治療人，就以呢個出發點去做呢首歌。」編曲由Heartgrey負責，Hugo負責副歌，五子各自在自己演唱的一幕填詞，湊合成一首抗爭歌。歌曲連日洗版，直接帶挈他們，Hugo坦言：「令人大反應唔係因我哋立場問題，而係我哋hit到每人心裏所想，我覺得作為音樂人嚟講，最緊要走到入大家心裏面。主要幫佢哋抒發感情，呢半年好多人有大抑壓積聚無法釋放，首歌畀到出口大家去稍為放低一啲負面情緒，轉化更好希望，去行前面嘅路。」
現今社會及職場瀰漫白色恐怖，政治立場鮮明分分鐘飯碗不保，繼文、Jerry和Angus均是舞蹈員，無懼政治顏色打壓，Jerry說：「本身有返內地工作，未來唔知亦唔理，做自己想做嘅事遠大於返內地做嘢，唔一定要去內地，可以去台灣、日本、馬來西亞、泰國又得，俄羅斯就唔去，因為都係共產。」全職音樂人Heartgrey有同感：「世界好大，嗰度只係版圖，繼續做自己做嘅嘢就會繼續有騷出。」從事廣告行業的Hugo則說：「公司畀好大自由度，信念意志大過一份工作，可能我有好多唔同身份，例如我係亞洲人、我係同志各樣都好，如果一間公司只係請男人，或只請女人，我唔同意呢個立場，世界仲有好多工，唔一定要做死呢樣嘢，有能力唔需要屈就，工作只係生活一部份，你有更加多嘢要追求同爭取時會權衡。」
冇理由去討好
有港星藝人做護旗手擁抱中共，為賺人仔自我滅聲，Jerry堅定說：「我想講一句說話『寧死不屈！』」Heartgrey曾在內地獲得三屆BITBOX比賽冠軍：「世界不斷變緊，近年大家都搵人仔，過多五年、十年變成點冇人知，可能突然爆炸呢，仲邊有人去做嘢！」Hugo坦言：「太依賴一個國家去支持經濟唔健康，香港係一個國際地方，以前香港歌曲可以打出國際，點解𠵱家要討好某一個國家嘅人，而唔係令到大家都鍾意我哋呢？咁先可以將文化同知識同人交流。」
撰文：卓寶花
攝影：仇志德
場地提供：HEARTGREY STUDIO