與大編輯到沙田馬會飲茶，埋單後搭𨋢，有三四位細路女在內，交談用英語，突然間有一位約七八歲小女孩講：「I don't like中文，I like英文。」父母聽見，面有無奈之色。
在馬會聽慣幼稚園至小學生年紀嘅小孩，不分男女，用英語交談，沙田陳太嘅孫仔孫女在遊戲室（Playroom）內見到陌生細路，都係講英語多過用廣東話，想落係中產富裕階級子女皆入讀國際幼稚園／小學之故，平時睇卡通又睇慣英語版Frozen， Lion King，Peppa Pig等。英美文化侵略香港，佔領兒童意識形態，不分藍絲黃絲家庭，愈係高級藍絲（如楊潤雄、羅范椒芬等級數），其子女愈鍾意美帝英殖文化。
左丁山呢類中大畢業生，無論聽見甚麼人，不分年齡男女，講一句「I don't like中文。」都覺得唔自然，唔自在，英文自然要通，否則在香港難以搵到高薪好工及欣賞美帝英殖文化，但不懂得中文的人，始終係不完全、不完美。藍絲最講現實：中國富起來了，到大陸搵錢，唔識中文，邊可以到大陸搵銀。中貿林都因為中文好，先至可以在內地行走四十年，走勻全國省市發財嘅箒，中文唔掂嘅話，即使係黃絲，如無陶傑梁文道葉漢良馮睎乾等人嘅中文水平，又點可以抵禦甚或反攻微信微博嘅五毛及田飛龍王振民呢類「紅色教授」呢？
大編輯就話：「見怪不怪咯，去年有朋友個仔考完DSE就去咗英國讀大學，聖誕返來與我飲茶，話唔知幾開心，卒之可以脫離中文唔駛讀中文，又話佢全班中學同學都唔like中文！特區政府教育局自回歸後共二十二年，真有辦法，可以將中小學中文科成為全港學生最don't like嘅科目。」如此說來，歷任教育局長自李國章數起，孫明揚、吳克儉、楊潤雄都抵鬧，不知是否黃師卧底，共謀搞垮香港中文教育，令美心太子女可以放棄兩代香港年輕人呢？香港絕大部份富裕高級藍絲都毫無例外送子女到英國美國讀書，可以大膽講句，大部份富二代富三代都唔慌識寫中文講稿，講普通話就得嘅，因為英美畢業後，父母就會送佢地上京學普通話（如外國外交官），回港得到一個甚麼政協銜頭之後，又會請一個內地普通話老師補習吖嘛！但呢班富二代政協多用英文思維，都唔知點同京官有同樣wave length。
未返到屋企，收到沙田陳太電話留言：「叫外孫女做小一中文功課，一頁幾十個字箒，佢喊咁口話：I don't like中文，I like英文，激死我。你有乜嘢好計？」大編輯得知，大笑：「叫陳太畀兩粒聖誕糖佢食，包佢孫女乖乖地做完中文功課！」