「至少到最後都沒有用走的。」這是日本當代作家兼馬拉松跑手村上春樹在《關於跑步，我說的其實是……》一書中，寫給自己未來的墓誌銘。
五十而知天命，跑過世界六大馬拉松的楊錦鴻（金毛鴻）在50歲生日前收到一份「大禮」──肺癌三期。不煙不酒不熬夜，偏偏點指兵兵點中他。回顧前半生，衝過無數終點，本以為還有一半賽事要跑，卻縮短至最後十公里。
「知天命」，並非聽天由命，金毛鴻就如孔子般懷着「樂天知命」的態度過日子，「我當跑馬拉松，報咗個比賽，係辛苦啲，我都要去」，毫無畏懼，永不言悔。
記者：張雅婷
以為老咗條氣冇咁順
金毛鴻自小是運動健將，踢足球做前鋒，又參加龍舟隊，但短跑竟是弱項。「跑100米輸成條街，小學、中學短跑包尾、冇成就感，覺得自己成日輸，唔係跑步材料。」
跑道上總落後於人，直到沙士爆發那年，女兒呱呱墮地，在公立醫院任職的金毛鴻眼見同事一個個倒下，終於意識到身體健康重要，開始接觸長跑。
2006年，190磅的金毛鴻參加100公里毅行賽，未有認真受訓卻在24小時內完成，「24個鐘好易，覺得輕鬆」。他順勢報名參加渣打馬拉松的全馬賽事，並加入跑會，正式開始長跑生涯。
2009年，金毛鴻遠赴柏林首次參加世界六大馬拉松（東京、柏林、波士頓、倫敦、紐約、芝加哥）。八年間，金毛鴻都以全sub-3（即在三小時以內完賽），完成了六大馬拉松的「大滿貫」，是香港首位世界六大馬拉松sub-3跑手，成就一時無兩。
跑遍世界，還有半個月就迎來50歲生日，金毛鴻要稍作休息。早於2016年時，金毛鴻發現身體轉差，「條氣無咁順，以為自己老咗」，其後看普通科醫生後未有再理會，直到今年10月，金毛鴻明顯感到疲倦、猛烈咳嗽和胃痛，照肺後終傳來噩耗。
上天幫我報咗個好難嘅比賽
本身在公立醫院任職放射治療部機械員，對此情景最熟悉不過，金毛鴻未有呼天搶地，反而淡然說：「冇辦法，揀中你，點指兵兵。」縱然性格樂觀，但金毛鴻當刻還是放不下「前世情人」，「嗰刻諗緊個女，點算呢？有啲最快，三個月已經……」，「我冇做錯嘢，30幾歲已經覺得健康好重要，我都算係服務病人行業，有供養父母」。良久，他才說：「擔心個女。」這是整個訪問中，惟一一次見到金毛鴻面露愁容。但他隨即又說：「但我頂得順，我冇驚過！」
非煙民非酒徒，生活作息有規律，但癌症還是找上了他。一度懷疑是空氣污染、食物安全、甚至是催淚彈惹的禍，但都無確實證據，「基因突變」或許是最好解釋。化療成功率約四至五成，金毛鴻笑說本身體質好，加上性格樂觀，有信心能跨過難關。「我喺長跑體會到係，你報咗名，咪照去，辛苦啲、30幾度唔緊要，照練。當𠵱家係上天幫我報咗個比賽，好難嘅，咁我𠵱家要積極面對囉。」facebook的生活動態隨即由過往跑步英姿變成和朋友聚會日照片，唯一不變就是金髮和笑容。
金毛鴻對跑步的熱情可謂瘋狂，甚至比一切重要，「一年365日冇停過訓練，生日照去、老婆生日又去、結婚周年照去，如果撞時間呢，我寧願揀訓練，提早慶祝」。連太太Mandy也曾埋怨為何丈夫總不在家，只有她照料女兒。
上天的「大禮」，終令金毛鴻好好享受家庭樂。從事會計的Mandy主動調節上班時間，早上6時20分就出門，只為可以早點回家陪丈夫晚飯；假日在外溫習的女兒Yoyo亦選擇在家溫習，「𠵱家想返多啲屋企食飯」。放假時，Mandy和金毛鴻會在海旁散步，靜靜陪伴對方，「感覺好唔同，睇到身邊好細微風景，同佢（金毛鴻）睇到平時冇留意嘅景物，腳步放慢、悠閒嘅感覺」。跑遍世界，最美風景始終在身邊。
人生最後十公里
訪問當日，金毛鴻本應和Mandy到日本參加大阪馬拉松，終未能成事。作為枕邊人，Mandy斬釘截鐵地道：「冇諗過會去，一定係陪佢，跑步呢啲野，佢好返，可以一齊去跑。」
人生就如馬拉松，但每個人的賽程都不一樣，「之前應該一半，有咗呢個病，已經覺得係最後十公里」，金毛鴻如此形容自己的賽程。「儍嘅，有排啦！點可以咁易！」Mandy反駁。Yoyo就索性不計較長短：「好好珍惜，仲有唔知幾多公里行落去，唔好忘記身邊嘅人。」
「個別參賽的成績和名次、外觀，不管別人如何評價，一切終究只是次要的事。對於像我這樣的跑者，最重要的事情，首先是靠自己的腳，確實地跑過每一個終點。」不只村上春樹，金毛鴻也做到了。「冇遺憾，我人生已經精采人哋幾倍。」他如此總結上半生。
基於禮貌，記者沒有問金毛鴻想在墓誌銘寫甚麼，這個問題也言之尚早，倒不如正面一點，問康復後最想做甚麼。「想慢活，搞基金，幫癌症病人。」下月就迎來50歲生日，記者率先收到邀請出席《金毛50生日會暨極地同行金毛跑會及癌症藥物治療資助基金發佈會》，Yoyo說這就是金毛鴻，「好正面，一路跑步都係想帶正面影響畀其他人，就算𠵱家病，都係想帶正能量畀其他人」。
「至少到最後都沒有用走的。」未來還會在跑道上看見金毛鴻身影嗎？「見唔到我拚命嘅身影，都做唔返以前嘅水平，只會輕鬆享受比賽，大型賽事可能會參加，陪老婆。」這個答案，相信Mandy會收貨，她的願望剛好是希望金毛鴻「帶住我跑！」
半百歲型佬怕化療脫髮
金毛鴻用髮蠟梳起一頭金髮，除了「型」以外，實在想不到如何形容這個即將步入50歲的「大叔」。得知患上肺癌要接受化療，竟然還有心情擔心影響髮型，「一開頭想自己剪咗先，鏟到skinhead（平頭）。睇住逐條甩，自己咪仲驚！」當醫生告訴他化療可保住頭髮時，他頓時放下心頭大石，但不可再染。金毛鴻，或許要改名。
金毛鴻貪靚的基因遺傳自父親，小時候就見到父親總愛照鏡、西裝恤衫指定要上千元的貨色，燙到起骨、連洗頭也要光顧髮型屋。中學時期的金毛鴻盡得老竇真傳，學校禁止gel頭，他就用風筒吹。
190磅肥仔複製Matchy長髮
80年代，外號「Matchy火柴」的日本男歌手近藤真彥紅透半邊天，190磅的肥仔竟蓄同一髮型。「中學同學已開腔叫我Matchy，icon嚟㗎，肥都肥得有型，唔係柒吓柒吓嗰啲，變咗我識人好易、識女仔好易，係學校成班女仔圍住我玩……」金毛鴻滔滔不絕，記者不禁問：「你老婆唔係初戀咩？」「係，老婆係初戀。」氣氛有點尷尬。
他隨即又說，年輕時留過長髮，好比香港男演員鄭伊健，「伊健未長頭髮，我已經長頭髮！」同儕反應讚不絕口：「嘩，呢條友留長頭髮咁有型！」90年代，日劇《同一屋簷下》熱播，他又和當時的新星江口洋介撞髮型，「電視做緊，我已經係咁嘅頭，咁咪有型囉！」
正式染金髮則是在千禧年代，目的呼之欲出。金毛鴻的「型」，在跑道上可見得到。他從不戴太陽眼鏡跑步，就是覺得自己夠「型」，不用遮掩。遇上鏡頭，必定展露笑容。「見到相機特登扮到輕鬆，我係鍾意咁，留返少少力。」旁人或會覺得他囂張，但金毛鴻卻認為這是跑步真諦：「跑得咁辛苦，影相先係證據，幾大都影返張靚相。跑快一分鐘有咩意思？影返十幾廿張相都可以留念下。」
自確診肺癌後，金毛鴻已沒有參加任何比賽和訓練，就讓這些照片成為最美好的回憶吧。