如果一個少女向人訴苦：我問過朋友食毒品會唔會對身體有害，朋友話唔會，點知第日take完嘢就high到頭暈虛脫失態出事，我就知道，我俾人跣咗。
你聽到無知少女的這番告白，你會如何反應？A，同情佢，覺得佢誤交損友。B，笑×佢，你無腦定無知？毒品唔會上癮你都信？你姓賴㗎咩！咁大個人自己唔使負責任㗎咩？
你問少女，既然知道朋友「跣你」，你有無同佢絕交？
少女嘆息，「我有試過提出絕交，點知朋友話，我地唔係好熟，就算絕咗交都唔會影響佢嘅人生，改變佢嘅決定，所以我就無同佢絕交。」
你會懷疑，這名少女應該是長期take咗嘢，所以神志不清。你絕交並不是為了要改變對方，而是要表態，和毒品說不！否則阿sir拉你的時候，肯定以為你們同流合污。
現在，香港出現了一位高齡無知少女，葉太。
她說早在6月9日，百萬人上街反修例時，她打電話問過政府，會否退讓，對方說不會，她相信了，誰知後來政府決定暫緩執行，她覺得自己被跣。
大佬！你從政幾十年，小妹妹的話你也言聽計從？你連自己獨立思考能力都捍衛不了，如何捍衛你黨友的議席？
去到6月9日，既然已經有百萬人上了街，你無論作為行會成員、資深政客、普通一個師奶，都應該有自己的判斷：民意不可違。
你為甚麼還要問林鄭政府是否繼續去馬呢？田北俊在2003年50萬人上街後，可沒有像你一樣窩囊，打電話問董生23條是否繼續去馬，他是直接表態跳船，這才是有擔當的政治人物！
田少辭職時，也不會像葉太一樣，「行會只是畀意見，要問責幾時輪到行會成員」。
如果葉太這樣看輕自己的角色，她留在行會豈不是自甘墮落？原來行會只是畀吓意見，和區議會無分別，那不如葉太選區議員吧！
錯不要緊，但能否認錯，而不要諉過不要姓賴？功就你領，錯就唔認，不如你去四點鐘做主持吧。