嚟到2020年，新年剪咗個武士頭嘅基斯坦奴朗拿度（C朗）即將35歲，不過佢仍然係祖雲達斯嘅重要得分手。最近有報道指，祖記計劃用天價年薪3,000萬鎊（約3億港元）同C朗續約至23年，到時呢位葡萄牙前鋒已經38歲。
上季加盟祖記嘅C朗，同球會嘅合約去到22年先到期。不過C朗最近喺杜拜出席頒獎禮拎最佳男子球員獎，佢就同經理人文迪斯話自己想同祖記續約到23年。祖記體育總監柏拉迪治知道C朗嘅諗法後，為佢準備咗一份為期3年嘅新約，兼附有續約一年嘅選項，C朗到23年嗰陣都成38歲，不過佢認為自己到時仲可以交到高水平嘅表現，睇嚟年齡對佢只係數字。其實早喺上年8月C朗受訪時就話過自己有能力踢到40歲，仍然好享受足球。
續約望以老帶新
有指新約仲係天價3,000萬鎊年薪，雖然比起目前合約嘅2,800萬鎊唔係加得多，但對年過30嘅球員嚟講算係好好喇，睇得出祖記對C朗都好有信心同非常重視。體育總監柏拉迪治原本希望喺今季季尾先同C朗簽呢份新約，但球會主席阿涅利就希望越快簽越好，事關佢認為C朗係目前球隊更衣室擔當好重要嘅角色，除咗可以分享自己大賽同奪冠經驗外，仲可以幫隊入面嘅年輕球員成長，好似馬菲斯迪歷特同拉比奧特咁，後者更有傳係愛華頓新帥安察洛堤一月嘅重點收購目標，祖記希望用C朗續約嚟穩定軍心，同時亦希望曾五奪歐聯嘅C朗可以為祖記贏番次歐聯。
場內場外幫到手
C朗加盟祖記一年半數據絕對唔失禮，幫球會上陣64場入40球。另外，C朗嘅人氣亦都令祖記受惠唔少，自從呢位ig有過億追蹤者嘅葡萄牙球王加盟後，祖記嘅官方ig由本來得1,000萬人追蹤，增加至約3,500萬人追蹤，仲超越曼聯成為世界第三多追蹤人數嘅球會。場內場外都幫到祖記，唔怪得球會同佢續約啦！