近期有巴西傳媒爆料，話今年7月同前妻伊蘭結束12年婚姻後，就火速同一個叫卡美娜嘅女仔撻着，而卡美娜就正正係侯克前妻嘅外甥女，而侯克之後透過助手發聲明證實戀情，啲關係認真係混亂！
33歲嘅巴西前鋒侯克，近幾年喺中超上海上港搵食，今年七月突然同老婆伊蘭離婚，佢哋育有2子1女，12年婚姻就咁玩完。不過，據消息人士指，侯克喺10月就同伊蘭嘅外甥女卡美娜撻着。卡美娜家陣都成31歲，有指佢都係幾個月前離婚，但唔知係咪因為要同侯克一齊所以咁決定。
結婚12年經常三人行
件事搞到咁，真係似足拍戲，但侯克冇諗住收埋卡美娜。侯克喺聲明提到，今個月21號就特登搵咗卡美娜嘅父母，即係前妻嘅家姐，同埋卡美娜嘅哥哥一齊三口六面講清楚件事，表明自己覺得呢段關係唔使遮遮掩掩，仲話係同伊蘭分開咗先撻着卡美娜，希望各位網民可以對佢手下留情。
佢前妻伊蘭以前都不時喺自己ig上載佢同卡美娜嘅合照，兩個人嘅關係非常之好，仲會成日一齊出去玩同行街。所以有指卡美娜覺得自己好對唔住阿姨，仲特登寫咗封信畀伊蘭道歉，指自己同侯克喺10月先撻着，並唔係第三者搞散佢哋，請求佢原諒自己。
呢單嘢爆出咗幾日後，另一位主角伊蘭終於打破沉默，透過律師發表聲明，指自己對於結束12年嘅婚姻非常難過，並且唔認同侯克將佢同卡美娜家陣嘅關係公開，因為咁樣會影響到其他屋企人。
前妻分一半身家嫌少
不過最麻煩嘅係分身家嘅問題，報道指伊蘭希望雙方和平分手，將夫妻二人嘅身家平分，不過侯克就堅持要跟番法律程序，希望得到法律意義上嘅離婚。有指侯克銀行嘅2億雷亞爾（約4億港元）身家，已經畀咗一半伊蘭，加埋名下80套房產，都可以畀對方任揀一半，仲表明如果以後搵到其他屬於佢嘅額外財產，都可以畀埋伊蘭。不過伊蘭一方對協議都係唔滿意，睇嚟最後都要搞上法庭。