特首林鄭月娥前日大大聲反駁美國《香港人權與民主法案》，話「究竟香港嘅市民喺邊方面嘅自由受到磨損呢？我哋有傳媒採訪自由……」一日後佢出席「國家憲法日」講座，點知《蘋果》記者就親身領略到，林鄭口中嘅「我哋」同「自由」，好多人原來都係無份嘅。
毛孟靜嘲自摑嘴巴
「國家憲法日」講座由勵進教育中心舉辦，中心理事會主席係全國人大常委范徐麗泰，嘉賓包括林鄭同各位司長，仲有中聯辦主任王志民、基本法委員會委員韓大元。《蘋果》記者梗係晨早去霸位啦，但係想登記入場嘅時候，就見登記表上面早就列明只有指定幾家傳媒至可以入場。
據記者所見，被欽點嘅除咗《文匯報》、《大公報》，仲有《南華早報》、《星島日報》、《明報》、《香港01》。《蘋果》同網媒《立場新聞》都因榜上無名而被拒入場採訪，只可以在會場外面企。
曾經做過記者嘅議會陣線毛孟靜都睇唔過眼，大鬧林鄭自摑嘴巴、自我撕下最偽善嘅面具。佢認為講座顯然係官方場合，只容許一啲「友善傳媒」採訪，係剝奪公眾知情權，篩選傳媒嘅做法亦係政治報復，脫離文明社會底線，令到香港越嚟越大陸化。
李八方