效力西維爾嘅查維亞靴南迪斯透露或會離隊，可能見同胞卡路士韋拿喺美國發展得咁好，有樣學樣轉戰美職聯，結束將近10年嘅歐洲球壇之旅。今季由韋斯咸轉投西維爾嘅「小豆」，喺西甲似乎亦擺脫唔到「後備殺手」嘅標籤，親自承認會考慮轉戰美職：「我一直都有思考自己嘅未來，並對各種潛在嘅機會抱開放態度，美職係我其中一個考慮嘅聯賽。而且美職一直有良好嘅發展，佢同其他主流聯賽一樣咁吸引。」小豆2010年由墨西哥嘅瓜達拉哈拉轉投曼聯，幫紅魔贏過兩次英超，不過自前曼聯領隊費格遜退休後，小豆嘅球員生涯就經歷起伏，無論佢效力皇家馬德里、利華古遜定韋斯咸都唔多掂。