友邦（1299）下月中踏入100年，撞正本港逆權風暴，慶祝也趨低調。其實過去一個世紀，集團也曾幾番風雨，2008年金融風暴幾乎拆骨放售，幸最終保住金漆招牌。作為友邦靈魂人物，獨立非執行主席謝仕榮早前在專訪說，友邦「係保險界少林寺」，培育了一代代人才，80年代初他回港掌舵，推動「AIA Family」文化傳承接班。他相信，即使年代變、銷售方式變，新一代或全用IT取替，但如果核心文化是適合，「就可以一代傳一代」。
四大家族紛開枝散業
年逾八十的謝仕榮，是保險界元老級人馬，職場生涯在友邦度過近一個甲子，曾形容2008一役是友邦「最淒涼」；而人生閱歷豐富的他，對記者就當前社會動盪的提問，未再置評。
友邦百年里程，要由司徒拔道友邦大廈兩父子故事講起。他說當年office boy是一位資深員工，負責揸公司鎖匙，每早開門、最晚鎖門，「後來佢搵埋個仔返嚟工作」，退休時更將職位連鎖匙「交畀個仔接手」。
「友邦有個文化，就係啲人鍾意間公司，第二代都請返佢哋入嚟，AIA最大文化就係一個大家庭形式嘅企業文化。」接班揸鎖匙做office boy，現代人未必感興趣，但賣保單做代理，為公司及個人累積財富，可能更有傳承吸引力。
高學歷也要由低做起
友邦早年Top Sales團隊，由四大主要家族開枝散業。「四大家族入面，全部第二代已經入晒嚟做，都已經成功咗。」像「宇宙家族」族長錢萬里，三代是友邦人，「Peter Chin（錢萬里兒子錢小龍）佢個仔（錢萬里孫兒錢永康）已經入咗嚟，第三代係讀Law；Robert Chau（「勵精家族」族長周子安）個仔（周建成）喺到；Joshua Wong（「奧林匹克族」族長王嘉倫）個仔王傲山又係。」
會否鼓吹公司裙帶文化？謝仕榮更正：唯才是用。「blue blood都要有興趣先得，可造之材先畀佢哋接班。」學歷再高也要「揼石頭」代理做起，成功就一路上，Supervisor、經理、區域總監，若領導無方即使承接父母團隊，「佢哋唔服你唔願意跟你㗎。」
友邦現有1.65萬名財務策劃顧問，承父母衣鉢又表現出色的下一代僅178人，街外精英仍佔主流。
坊間有傳，昔日友邦代理捽數狠、兵行險着，每早晨在天台揮拳叫口號。謝說「講笑箒，經紀當做早操提吓精神。」當年他設直銷團隊，「一早八點半，我哋熱吓身、唱吓歌嗰種，喺office做，等於出發前舉吓手，我愛AIA之類。」
至於sell單勇進，他指公司培訓一定合規合矩信譽行先，但「我哋咁多人間中一兩個兵行險着都會有㗎嘞」，現代監管嚴謹再沒灰色空隙了。
記者：劉美儀