區議會選舉完咗，之前好多藍絲同大陸人信晒左報宣傳，以為建制派贏硬，香港好多人支持「止暴制亂」，點知民主派大勝，自然一地玻璃碎。有「光頭警長」之稱嘅警署警長劉澤基噚日又喺微博發表偉論，大鬧香港人支持民主派，仲嚇香港人「針不刺到肉不知痛，未來的日子，就讓你們說的『攬炒』發生吧」，叫北京停止幫香港，不過網民似乎唔多怕，仲話不如快快懲罰！
有人提議踢香港出中國
劉澤基喺文入面話，香港有六成人支持民主派，某程度上係支持破壞、支持暴力喎，認為未來香港情況一定更差，佢就希望是壞到極處，可以由破而立，又隔空向香港同袍話未來幾年有排忙，叫兄弟們要有身心準備喎。
佢之後仲要香港人反省，等港人知道以往嘅日子係有中央政府幫助及愛護，所以佢希望北京即時停止對香港人嘅幫助，「就讓他們看看沒有祖國幫助後的香港是如何光景！」又叫愛中國嘅香港人未來繼續努力保護香港，但又話你班香港人往後日子一定唔好過，要有心理準備喎！
咁係咪真係唔好過就冇人知，不過班網民似乎唔多怕，有人話不如全停自由行，又有人話不如禁大陸人嚟香港定居，仲有人話不如踢香港出中國喇，總之個個話不如快快懲罰香港！
李八方