【黑鏡線索】
上次講到，客觀睇，香港嘅自保籌碼，經過呢廿幾三十年，就只有恃住自己係中國要害呢一環，即係一旦逼到埋牆會自殘嘅威脅。中國擺到明，留島不留人，甚至連「留島」都唔夠準確，佢要嘅係香港嘅優惠地位，通去國際攞着數。無論佢點吹，中國都仲係倚賴歐美，一日仲倚賴歐美，即係一日仲要倚賴香港呢個特殊窗口。
宣揚大中華膠 矮化香港價值
政權要減低呢個自殘威脅，宣傳上有兩個重點。第一，令大家覺得中國唔係好需要香港。你見近幾年，不斷有親政權人士，放風話中國已經崛起，香港嘅貢獻好細，再搬啲fake history出嚟，話金融風暴全靠中國救，沙士又係中國救。水就只可以靠東江水，豬就只係有大陸豬。總之香港乜嘢都係靠中國救，只有香港倚賴中國，絕冇中國倚賴香港。就算係中國企業靠香港cap水，都講到係施捨咁。呢一切，都係等你不斷矮化自己，唔好發現自己手中嘅籌碼。
第二，令香港人唔好向自由世界盟友求救。所以就不斷宣揚大中華膠思想，香港同中國係命運共同體，血濃於水，中國好香港好，用「回歸」包裝「殖民」，有乜事都係家事，唔好搵外人插手。恰完你，就話無論對錯，有事慢慢講，千祈唔好對外求助，始終係一家人。外國勢力，亡我之心不死，個個都係靠害，冇個好人。總之要令大家忘記自開埠以嚟嘅自由世界身份，自行切斷同自由文明嘅連繫，大灣區嘅事，大灣區入面解決。
移交之後，呢兩類宣傳不斷做，大致做到效果，表面好似非常穩定。但當特區政權不斷閹割議會，中國政權將一國同兩制之間條線越移越過，香港徹底失去對中國說不嘅高度自治，終於將潛藏嘅矛盾，推到臨界點，逼到埋牆角。有人話香港人抗爭係嘥鬼氣，就算特區政府民望跌破世界紀錄，背後都有中國撐腰。
美國通過法案 推前自殘抗爭
區選大勝嘅意義，係以一人一票變相公投清晰確立，香港大多數人，喺擁抱溫飽價值逆來順受，定係堅持抗爭做自由世界文明對抗極權嘅前線之間嘅選擇。但大家都知，就算聚集全港民意，都唔足以爭取到高度自治。所以當政權話之你繼續扮聾， 唯一選擇係自殘式抗爭，兄弟爬山，各自努力，爭取國際把刀，放喺香港頭上。
五個月嚟，試過唔同嘅方法，由機場和你飛和你塞、到三罷/被三罷，守衞大學等等，每一樣嘗試，都有人有時間金錢損失，甚至好多人作出好大嘅犧牲，付出血肉青春生命咁爭取。當然唔同嘗試有唔同效果，但最終加埋嘅結果，係美國帶頭出刀，通過《香港人權與民主法案》，將香港自殘式抗爭，推前咗一步。當你見到有啲高官物體，好激動係咁鬧佢哋口中「枉費心機嘅廢紙」，幾可肯定，some good has been done。
撰文：宋漢生
fb : sunghsblog