馬國明、唐詩詠、李佳芯、薛家燕同鄭俊弘等前晚盛裝出席喺新加坡舉行嘅「星和無綫電視大獎頒獎禮」，馬國明同唐詩詠憑《白色強人》奪得最佳男、女藝人獎，成為新加坡視帝、視后，而李佳芯就奪得TVB最喜愛角色獎。
新加坡舉行嘅「星和無綫電視大獎」一直被視為視帝視后前哨戰，而今年因香港社會局勢問題，《萬千星輝頒獎典禮》改喺下年1月舉行，唔知馬國明會唔會再下一城奪獎。而呢幾年有唔少有人氣藝員都離開無綫，除咗小生、花旦大逃亡之外，連綠葉、甘草、主播等都離巢，但係總有人會繼續堅持，就好似馬國明咁，唔經唔覺已經服務咗無綫二十年。
入圍12次
雖然馬國明次次喺台慶頒獎禮都做陪跑員，每年都呼聲高，但總係同視帝擦身而過，但佢依然繼續效忠，睇怕今年終於都會輪到佢。而之前傳過馬國明扭計，用唔續約呢招想撼呼聲都好高嘅《解決師》王浩信，爭獎攞視帝。睇番馬國明之前嘅戰績，已經有12次入圍視帝，每次都係打入最後五強，但就係「點都唔畀你」，今次算係攞個頭彩。
撰文：馮仁昭