區議會選舉就到，建制派抹黑自然不遺餘力，但抹黑都要講吓水平，唔係求其整啲嘢出嚟就算，特別係由抹黑變鹹濕，仲要錯漏百出，好似網上流傳，有本疑似由《文匯報》搞、喺各區派發打反送中免費特刊，入面細位就發現笑位處處，封面維港旭日由南邊升起已經奇；封底大大隻字「Once You Go Black You Never Go Back」，真係令好多識英文女讀者尷尬，亦令人相信藍絲真係唔識英文！
傳《文匯報》印製
八方見到網民post出嚟全彩色特刊，封面印住「諗掂未？香港未來……」幾隻字，背後嘅維港景色太平山後有一個唔知係日出定日落嘅太陽。雖然八方方向感麻麻，不過以做咗香港人咁多年嘅經驗，太陽由南邊升起確係唔太尋常，唔知設計班底唔係香港人，定係對選舉結果有咩暗示咁呢？
呢本特刊中心思想，離唔開批評近日示威活動充斥暴力，令香港籠罩住「黑色恐怖」，又歸咎泛民係暴力元凶，幾乎每頁都批評泛民係運動嘅「大台」云云。不過睇到封底先知，雞乸咁大隻字黑底白字寫住「Once You Go Black You Never Go Back」，可能佢哋想叫人唔好做黑衫示威者，實情呢句係美國白人俚語，講女生跟黑人交歡後或難以回頭，由於涉及「性」同「種族歧視」，一般美國人一定唔會公開咁講，但特刊公開印出嚟，真係冇品兼低俗。而《文匯報》編輯部前晚深夜出咗聲明割席，話本嘢唔係佢哋印同派，一切內容都同《文匯報》無關咁話。咁真正出版者係邊個呢？不得而知喇。