【爆相爆片】賭王何鴻燊三房千金何超蓮，今年4月爆出戀上內地男星竇驍，雖然二人分隔兩地，但依然爭取時間拍拖。讀者盧小姐透過《蘋果》嘅「爆相爆片」，分享超蓮日前同竇驍遊長洲嘅甜蜜情況，着住粉紅衞衣嘅超蓮帶男友食平民大牌檔，相當貼地。盧小姐話：「當日下午兩點左右，初初唔知係超蓮佢哋，不過佢哋講嘢好大聲，又笑得好大聲，攬攬錫錫，我先發現到係佢，佢哋全程旁若無人，即使有人眼望望都冇理。」
普通話傾偈
盧小姐話超蓮同竇驍係用普通話傾偈：「佢哋食完粉麵就一齊玩手機，係咁放大縮細睇啲圖。」其間竇驍用強大嘅臂彎一手將超蓮擁入懷，冧到女友甜絲絲。超蓮之後人有三急，問咗公廁位置就單拖去解決，竇驍未有陪伴。超蓮去完廁所返嚟，盧小姐話：「竇驍話佢件衫濕咗，幫佢整。」食飽後，超蓮同竇驍十指緊扣離開，盧小姐表示：「埋單時先至發現有疑似超蓮助手上前幫佢畀錢同拎袋，睇番啲相先發現助手一直坐喺度，但同佢哋坐好開。」當日超蓮亦有喺Ig story貼出食湯粉同西多士嘅相，不過就唔見竇驍嘅靚仔樣。
超雲笑笑口
超蓮同竇驍早前先拍拖到大溪地度假，之後又被爆蜜遊加拿大，竇驍疑似帶女友見家長。上月超蓮同竇驍由上海拍拖拍到返香港，當日男方仲以「準駙馬」身份入住三房大宅。
至於超蓮家姐超雲，早前爆出新戀情，被指同年約50歲、三太澳門公司某失婚高層拍拖。噚日超雲去養和探賭王，逗留半個鐘就走，見到傳媒時罕有咁展現笑容，叫佢不如講吓新戀情，佢微笑回答：「唔會喇。」跟住上車離開。