鄧建明（Joey Tang）曾經是放學後流連商舖，不愛讀書的學生哥，後來收到媽媽送給他的結他，成為他人生的轉捩點，孭住這份禮物，他走遍世界各地演出。音樂令他廣交朋友，尋覓到理想目標。後來兒子出生，Joey也用音樂去薰陶他，難怪兒子中學時期已有職業敲擊手水準。
鄧建明日前在觀塘接受《蘋果》專訪，他說3、4歲已接觸音樂，身為家中獨子，媽媽不讓他出街玩，每日坐在收音機旁，當時湯正川與吳錫輝兩位DJ最影響他，令他接觸不少英文歌：「當時有首六分幾鐘英文歌《Band On The Run》，係Paul McCartney唱，我嗰時小學二年班，俾首歌編曲吸引，最後仲背埋，可能自細聽英文歌，中學會考我得三科及格，其中一科係英文。」
「冇再留班」
Joey父親最初反對他玩結他，直至中一才讓他學中樂的笛，可惜當年留班，令Joey有一陣子放學後只顧流連商店。媽媽當然最明白兒子心意，便用一支結他留住兒子的心，Joey笑說：「媽咪呢招好聰明，之後我每日做完功課都留喺學校，跟同學一齊練結他，冇再留班。」
兒子玩敲擊
媽媽以結他開啟了他的理想大門，Joey亦戮力啟發兒子Justin的音樂天份：「嗰時我哋一家三口成日去海洋公園玩，我就喺車度不停播歌，大概半年囝囝就哼Maroon 5嘅歌，我知成功咗。」
Justin中學時已擁有職業敲擊手的水準，早前到澳洲升學，Joey提議兒子主動參與校內音樂學會︰「個仔去到澳洲，因為冇嘢做，似我細個咁行商場，點知到佢喺校內試打鼓，老師就留佢喺音樂學會，佢𠵱家每星期都有固定練習時間，音樂真係幫到人際關係。」
正因為音樂令他贏盡友誼，他下月20日在九龍灣Star Hall舉行「Joey Tang Music Playground 2019」，嘉賓位亦佔了半個騷時間。
場地：BALL ROOM
髮型：Selko of Hair Culture
化妝：Kei Kei Ng
撰文：馬建華
攝影：沈健程