【黑鏡線索】
前排，有中學生問，當年政權移交，點解大家冇抗爭？
呢條問題，我諗唔少2019年嘅香港人，回頭睇，都覺得匪夷所思。那些年，支持所謂「回歸」嘅，係主流民意。係，有好多人移民，亦有個別人士如倪匡屢次警告大家。但事實係，就算發生埋春夏之交嘅坦克轆人，多數人係接受移交。咁到底當時大家個大腦，係咪生咗喺個屎忽度？係咪集體撞邪事件？嗰個係咪真係我嚟？
當然係集體嚴重誤判。問題係，大家一齊諗錯咗邊忽？錯咗喺啲乜嘢基本假設，令到上百萬人嘅判斷，錯到無可更錯？
大中華膠毒解釋唔晒
一個講法，係大家中咗大中華膠毒。多得多年集體潛移默化，由中學中史堂、各種賑災show、到金庸電視劇、汪阿姐勇敢的中國人，長年累月，一旦膠毒上腦，大腦喺某啲問題上嘅思考，會長期受阻，啟動愛國模式，理智完全發揮唔到作用，情感綁架高於一切。於是乎，就對移交後嘅統治，過份樂觀。
中毒肯定係真，應該同誤判有關，但未必解釋得晒。因為，當年對中國誤判嘅，唔單止係香港人，起碼仲有主流美國人，誤判到，總統克林頓，會走去大力保薦中國加入世貿。克林頓冇理由中咗大中華膠毒啩，咁到底佢又諗錯咗啲乜，搞到而家俾國民鬧，當年擔保咗個流氓入馬會？
睇返克林頓當年保薦中國入世嘅發言，幾咁自信，幾咁大口氣。佢話，兩樣嘢。第一，中國加入世貿，就要開放經濟，當人民有咗經濟自由，下一步就會想要政治開放，咁中國民主自由化，就指日可待。係，當年就係一個咁樂觀嘅年代，共產大佬蘇聯都冚檔，自由世界大獲全勝，勢頭好到，歷史學家會衝出嚟宣佈見到"the end of history"。
克林頓的零分誤判
第二，克林頓揚言，當時冒起嘅互聯網，中國點ban都唔會ban得到，有咗互聯網，就必定通訊自由，通訊自由流通嘅地方，邊有空間畀極權生存？所以，美國支持中國，放佢加入自由世界圈，大家遷就一下，包容一下，就一嚟美國公司可以打入十億人市場賺錢，二嚟又好正義，企喺歷史潮流嗰邊，真係點睇都冇得輸呀。
結果？兩樣都錯晒，零分。經濟上，只有中國打入人哋市場，偷呃拐騙，人哋入嚟就諸多限制，只有其他成員跟規矩，中國就十萬個理由唔跟規矩。互聯網呢？講到底，科技係中性，冇話一定係只有正面作用，中國不僅用萬里防火牆，真係擋得住出面嘅資訊，仲犀利到，用銀彈收購戰術，掉轉頭輸出審查到世界其他地方。今次，美國人睇死中國人做唔到嘅，中共做凸雙倍畀你睇，完勝。美國香港一樣滿地眼鏡碎，「民主回歸」同「入世變文明人」論述，宣佈破產。
香港距離近，俾人搞先，雖然中咗大中華膠毒，都係早些少覺醒，俾777開猛火一煮，即刻彈返醒。美國距離遠，燒得冇咁應，香港文宣眾籌登報，短時間內都難以入美國人屋。好在對手自毁力驚人，從NBA到遊戲電競切入，親身示範，疾呼Stand with Laden，令美國睇波打機大眾醒悟，中國vs自由世界係乜一回事。
Chinazi愛國主義，不但導致own goal，仲要唔知自己own goal緊，仲以為數緊人，因為成個認知已經扭到同世界脫軌。唔難想像，一旦譬如曼城領隊哥帥，被人「借」咗個Twitter賬戶嚟，出個Catalonia stands with Hong Kong嘅post，然後愛國五毛立刻叫囂，拉扯一輪最後央視宣佈拒播歐洲英超德甲，中國人梗係睇中超，咁777就連歐洲普羅大眾都叫醒埋，由香港反送中燒到變西方國家反中國，we connect衝出國際，威力無遠弗屆。
撰文：宋漢生
fb : sunghsblog