有共同敵人，並不一定做得成朋友，譬如法輪功集團，無論反共反得多歇斯底里，我都不打算挨埋去和他們齊上齊落，甚至堅持不轉發他們麾下媒體的文章──那份日報不叫《大功報》，真是暴殄天物，可見法道中人基因全無一點一滴camp成份，點都唔會傾得埋。何況失身事小失節事大，有些群組是萬萬惹不得的，一個不小心拍咗膊頭，條數成世還唔清，大人警戒無知小童千祈咪貪得意加入黑社會，絕對不是開玩笑。同樣道理，美國總統間歇性舞動神經刀撐港，咪使旨意我點讚，這種瘟神冇品冇格冇心肝冇口齒，蝦霸對象一時一樣，比李小龍更深諳「若水」哲理，縱使偶爾發揮以毒攻毒奇異效果，勉強叫做醫得吓咳，誰知道長期患痢疾的狗嘴下一分鐘會屙啲乜，跟在他後面隨時會搞到周身屎㗎，你諗你啊吓。
不過《衰仔樂園》粗口爛舌媽叉厲害國，就一定瞓身支持，美式英語再不靈光，也昂然奉陪大合唱，齊聲呼籲全球停止為經濟利益出賣尊嚴，有咁大力得咁大力高呼「唔好繼續錫中國個屎忽」。另外，北京姊妹城市布拉格，現任市長選擇親近台灣，心胸淺窄的大家姐當然黑面，手起刀落取消四個捷克樂團大中華巡迴演出，誰不知卡夫卡的同鄉驚都未驚過，不但不向強權下跪道歉，還毅然宣佈脫離結拜關係，我一讀新聞樂不可支，自動請纓為骨氣市長設計字正腔圓的粵語對白：「你隻刁蠻公主好叻咩，咁倀雞，鬼至恨同你做姊妹。」核心價值南轅北轍，何必強顏歡笑扮親熱，有些席是應該割的，與其忍氣吞聲做姊妹，不如痛痛快快做衰仔。